"حبيبتى تستاهل" قصيدة جديدة للشاعر محمد السيد

الحب عايز تضحية
وحبيبتى تستاهل
والموت قـُليّل قوى
عند اللى يهواها
حب البلد دى كده
دايما ماهوش ساهل
لكن يهون كل ده
بالعيشة جواها
هى اللى فيها الأمل
والنيل بطول الأرض
هى اللى ليها الأمل
دايما مقدم عرض
هى اللى بيها الأمل
أصبح حقيقة وفرض
ومملكانا الأرض
وتاريخ يعلى الشأن
وإن مرة رجعت ورا
حاجزة المكان قدام
مالهاش فى لبس البدل
ولا حتى ربِّـت دقن
مايعشلهاش أوصيا
مايموتلهاش أحلام
حلاوتها زى البشر
بتزيد مع الأيام
وجمالها زى الشمس
بيشوفه كل الناس
تغضب على السلطان
وتحن عــ الكناس
تقرص ودان العمم
والنخبة والحراس
تضحك فى وش الولد
اللى حافظها نشيد
واللى عشانها اتولد
وعشانها يبقى شهيد
دايما مع اللى صبر
بتظبط المواعيد
حرَّة وطول عمرها
ماتحبش البهدلة
هى الذنوب والصلا
والحل للمسألة
وتكون فى عز الغلا
سكر لكحك العيد

* من ديوان أبيض غامق يصدر قريبا عن دار دون