د.على جلال كاشف يكتب: ادفنونى فى إسرائيل

كتبتها منذ عام تقريبا اعتراضاً على مولد أبو حصيرة
ولم أكن أتصور أنه سيتم منعه فى مصر بقدر تصورى احتمال دفنى فى إسرائيل.. بركاتك يا ثورة.. إليكم القصيدة..

فوق أرضى لن يمروا
بس مروا
ابنى مات فى الحرب جايز
ولا عايز يجى تانى بس عاجز
افتراضاً إنه مات
فاحتراماً للى مات
بطلوا جبن وسكات
مصر حبه ويفتحوها خمارات
بالمحبة بالمودة باللطافة بالسياسة
بالخباثة وبالكلام
واللى مش قادرين عليه بالحرب
قدروا بالسلام

مش إنتو إللى حللتو
نقل رفات إللى ماتو
ولا دا مسمار جحا
إللى دقو فى بيت جيرانو
مولد أبو حصيرة باشا
كله جاى يزور جنابو
دلوقتى طبعاً…
كل واحد فيكو عايز
أى نبذة عن حياتو

من مواليد إسرائيل
قبل ما تبقى إسرائيل
جه لمصر الباشا عايم
فأصبح الشيخ الجليل
استقر ف مصر عصر
واستمر فى الجهاد
بس فى إيه ضد إيه
الله أعلم يا خليل
كان حرامى كان عصامى
كان يهودى ولا مسلم
لسه مش لا قيين دليل
كان مناضل كان مقاوم
قبل ما تبقى إسرائيل كل أبطالها عوالم
كله جايز
وإللى عايز الدليل
يسأل الهم التقيل

ذكرى موته
الحاخام خلاها عيد
قال فى سره
هو دا مسمار جحا
لحائط المبكى الجديد

هو من جبنه فى سره قال كلامه
أما أنا فاسمعونى
لما أموت أبقو ادفنونى
ادفنونى فى إسرائيل
اعملوا منى جحا
ودقوا مسمار القتيل
وابقو روحوا زوروا قبرى
هو دا الحل المثيل
باللطافة.. بالسياسة وبالخباثة
رجعوا الحق إللى وخداه إسرائيل
ادخلوها بعد موتى
وقولوا كان مسلم أصيل