طارق عليان يكتب: الأرصـفة البـاردة

---------------------------------
كـان نفسى يوم يا وطـن ضحكـتك
تشـبهنى
لكـن لقيت العسكـرى بالتـهمة
يشـبهنى
أنا إللى فارد دراعـى وشـوقى
سـابقنى
بصـيت لقيت إعـلام بالـزور
سـابقنى
كـل العيـون نامت
وعيـونى ما نامتشـى
كـل الضمـاير هـدت
وضـميرى ما هـديشى
أنا اللى انكـويت بالنار
وغـيرى كـل عيـشى
عشقك وقلبك يا وطـن للغـريب
وسـايبنى وحـدانى
ع الأرصـفة البـاردة
وكـأنى ورقة شجـر
فى مهب الريح للشاردة والواردة
هات دليـلك يا وطـن
على إنى أشبهـلك
أنا عـندى ألف دلـيل
على إنى مش منك
أنا ابن غيـر شـرعى
وبينكسـر قلـعى
من غـير وجـود الريح
أنا حـبى لك يا وطـن
من طـرف واحـد
وأنت حبك يا وطـن
بتـوهبه لجـاحد
ولما تغرق مركـبك
الدنيـا بتلومنى
أنا اللى عـايـش فى نهاية السطر
فاقـد عنـاوينى
ولما تضـحك يا وطـن
نكـتك تبـكـينى
العـدل هَـم النـاس
وأنا هـَمى أكـل العـيش
إيه الخيـار يا وطـن
غيـر إنى أكـون درويـش
أنا اللى بغزل من ضلوعى وهْم
وبنسـجهـم وطـن
وأقـنع نفسى بألف كـدبة
لكـن خـلاص يا وطـن
شـبعت من كـدبك
هات دلـيلك يا وطـن
على إنى أشبهلك