طارق عليان يكتب: حـرية ولاَّ دردشـة

طلع النهار والميدان نايم
جنبى على فرشتى
والثورة عطشانة
وهى قريبة منى
بشـدها لسـكتى
رصاصة تقـتلنى
شديت على جسمى النحيف ورق الجرايد
ارتجفت
صحى الميدان م النوم
ضمنى ف صـدره
كان حلم ولاَّ حقيـقة
حـرية ولاَّ دردشـة

طلع النهار والقاهرة بتتسـرق
وبينـشلوا حلمها
من بين صـوابعها
ف الأصل والصورة
يعدى قطـر الخـوف
مليـان بضـاعـة
والبوسـطجى بيطـوف
أوطـان مبـاعـة
والدمغـة مجـانى
توهنى بين الضحية والجانى
كان حلم ولاَّ حقيقة
حـرية ولاَّ دردشـة

طلع النهار والسويس تايهة
مش لاقية خطوتها
والبحـر رافـض حضـنها
رافـض يغنيلها
والثورة ضلت ف الطـريق
كـترت ذئاب ليـلها
كان حلم ولاَّ حقيقة
حـرية ولاَّ دردشـة

طلع النهار واسكندرية غرقانة ف دموعها
لابسـة تـوب الحـداد
بتـودع الشــهدا
لا عـرفت الجـلاد
ولا الجراح تهـدا
والبحـر بيـعـافـر
ينسى تفاصيل الوشوش
كـان الشـهيد عشـقه
من ألف وجه بشـوش
البحر ما بيعرفش يكدب زينا
البحـر لـون واحـد
إحنا النفاق والكدب يجرى ف دمنا
والـرصاص شـاهد
كان حلم ولاَّ حقيقـة
حـرية ولاَّ دردشـة