يلا بينا نقلب الصفحة
فى آخر الكتاب
ننسى ليالى الوحشة
كانت عتمة بلون الهباب
ننسى الضلمة
اللى خلت أحلامنا سراب
ننسى الشعر الأبيض
جليد غطا راس الشباب
تعالوا نزرع الأمل فى قلوبنا
ننسى أيام الضباب
تعالوا ننسى
اوعوا تقولوا لأ دا لسه
الشمس بخيوطها نسجت
قصيدة أمل فوق الهضاب
قيدوا الشموع
افتحوا الأبواب
زينوا الشبابيك
بسم الله خطوا الأعتاب
إخوانى سلفى مسيحى
مفيش لهم غير مية النيل شراب
وأعشاشنا بناناها من خلطة
الميه والتراب
وعلى دكة المدرسة
فتحنا سوا أول كتاب
ومع الصلاة
وقفنا حفاه
كل واحد منا له مع ربنا محراب
كلهم إخوان
كل واحد شايل بين ضلوعه
أمل بينور شموعه
شايل قلب إنسان
كلهم عطاشا
عايزين يدوقوا طعم الأمان
عايزين حرية بطعم الرمان
عايزين كل واحد
يايديه وعرقه يبات شبعان
عايزين بلدنا تعيش
زى النيل من قديم الزمان
زينوا مداخل البرلمان
يلا بينا نقلب الصفحة
حلفتكم بمصر
لا تقتلوا فينا الفرحة
أنا شايف صوتى تحت القبة
وكلى فخر
بيقول أنا هنا بالحصانة
تحت قبة المجلس
بالعقل والمنطق أناقش
ومع الكبير أجلس
وعند باب البرلمان مفيش حصانة
أنا أودعتها داخل المجلس أمانة
حب أهالى الدايرة
هى دى الحصانة وشمسيتى الدايمة
ونسمة فى عز الصيف
على الراس سايره
حب الوطن مش فى الحقوق وخلاص
كمان فيه واجبات
وعيوننا على الوطن حراس
يلا بينا نقلب الصفحة
وشمسنا وقمرنا فى حضن دافى
بالفرحة
صورة ارشيفية
مشاركة
اضف تعليقاً واقرأ تعليقات القراء
مشاركة
