راضى على حسين يكتب: الله الله يا بلادى

الله الله يا بلادى
أنا شايف صبحك بينادى
والفرحة بترقص على نغمك
وجناينك طارحة عبير نادى
**
الله الله على نيلك
والقلب اتشعبط فى نخيلك
وعيون المولى بترعاكى
والحب معطر مناديلك
**
الله على شمسك وشبابك
والحضن بيجمع أحبابك
مرسومة الضحكة على خدودك
والورد مفتح على بابك
**
الله ع الثورة وثوارك
رشـُّوا ع العالم أنوارك
والثورة بتمسح فى مكانها
وإيدين بتلون أسوارك
**
الله على ابنك وشهيدك
باع روحه عشانك جاب عيدك
والمسك أهو فايح من قبره
واهو دمه بينبض فى وريدك
**
الله ع الجيش وتحريرك
حافظ على عهدك ومسيرك
وعرقنا هيطرح بساتين
والمصنع يغزل فى حريرك
**
الله ع الشعب ومتجمِّـع
والصوت باسمك بيسمـِّع
الشعب وجيشك إيد واحدة
وقلوبنا بتهتف بتدمِّـع
**
الله على حاضرك وماضيكى
والروح بتحلم تراضكيى
والجسم تحنـَّى بملامحك
وكفاية قبورنا ف أراضيكى
**
الله على بكرا وأزهاره
والطير بيغرد فى نهاره
والشمس بتفرد ضفايرها
والصحرا بتحضن أنهاره
**
الله على ليلك وسماه
وهلالك طالع بمناه
والنجم بيكتب على ورقك
والبدر بيعزف فى غناه
**
الله الله وبنكبـَّر
المولى راعيكى وبيدبـَّر
يا رمز العفة وسلام
إزاى عن حبك هنعبـَّر؟!
**
هنعبر عن حبك بكفاحنا
وجهود أرواحنا ونجاحنا
ونموت ونضحى وتعيشى
وهنحمى ترابك بسلاحنا
**