أحمد حسنى إسماعيل يكتب: محدش عايز ينتحر ببلاش

النهارده بقى جايبلكم وصفة سحرية ومجربة ميه فى الميه وكمان مش حتكلفك أى حاجة خالص لحبايبنا المرضى اللى زهقوا من عيشتهم ومرضهم وعايزين ينتحروا ومعهمش فلوس.

أقولك عليك وعالوحدة الصحية حتلاقى عزرائيل هناك مستنيك والبركة فى أخواتنا الدكاترة اللى عاملين إضراب لأن عيشتهم متدنية وياحرام مش لاقيين ياكلوا ولا يركبوا عربيات آخر موديل بس اوعى حد يفهم كلامى غلط ويروح العيادات الخاصة أحسن تجيله ذبحة من اللى حيدفعه فى تمن الفيزيتا ده غير كمان أن مفيهاش إضراب لأن الإضراب فى المستشفيات الحكومية بس بتاعت الناس الغلابة.

أما بقى العيادات الخاصة بقى بتاعة الأغنياء دى فيها الدلع كله ده ممكن كمان تطلع بعروسة من هناك.

آه فعلا ما كل حاجة ممكن تحصل فى زمن فيه إضراب للأطباء اللى هما أعلى مستوى معيشة فى مصر.

والنبى يا ولاد الحلال حد يقولى هو اللى بيحصل ده حقيقى؟ولا حنلاقى حد بيقولنا دى الكاميرا الخفية؟

والله أنا خلاص تعبت ياعالم ياهوه بقى الدكاترة يعملوا إضراب؟

أومال الناس الغلابة اللى عايشة تحت خط الفقر يعملوا أيه؟ يولعوا فى نفسهم بقى ولا أيه؟
لكِ الله يا مصر