محمد رشاد حسنين يكتب: ولاد شوارع.. ف الميدان

فتـّحت عينى رضيع
على سقف "ستة أكتوبر"
من ماية الشتا
الكوبرى ده غطانى

وبـَلِف أبيع مناديل
أو ف السبيل.. عابر
ولما آآآجى أرّوح
رصيفه عنوانى

سمّونا.. ولاد شوارع
يبقى الشارع أبونا ؟!
قالوا ده شارع الحكومة
قلنا... دى مِـراة أبونا

الليلة كنت جعان
جانا ضيوف كتير
باتوا معانا ف الميدان
جايبين معاهم خير

كانوا بيهتفوا: حُـرية
عايزين كرامة وعدل
صَـبـَحنا صحاب قوام
وعرفت معنى الأهل

وف ليلة زى العيد
طرَح الميدان زغاريط
قالوا مُـنانا اتحقق
أُس الفساد.. غار

نِـزلتْ من عينى دمعة
هتمشوا وتسيبونا؟!
ده احنا عِشرة ميدان
يا معشر الثوار

فرحان أنا ليكوا
فرحان أنا بيكوا
بس أمانة عليكوا
ابقوا تعالوا زورونى
واوعوا ف يوم تنسونى
ده حلمكوا اتحقق
يمكن .. عشان أنا فيكوا