الحزن والقلق
أصحاب تقال
مين اللى شال من جنبى ضحكة
كات هنا.. فى جيبى الشمال
ياربنا
يامحير العقل اللى بيفكر فى قلب الجمجمة
الدود ودود عـ الأرض زاحف
كل السلاحف ليه بطيئة
وأحنا البشر ..
متعلقين ليه فى الحقيقة؟
ياربنا
أكتر مافى خلقك بيعجبنى
لحظة غروب الشمس
وميلاد البشر
لحظة صعود الفكرة
ووقوع القدر
سيستم حياتى مش لاقيه
توهان بيضرب حيرة وسجارة حشيش
وانا والسعادة مابنلتقيش
ومازلت باحلم
ياربنا
ياللى أنت أعلم
بالبداية والنهاية وخطوط الحياة
ياآبانا ياللى فى السما
نحن الرعايا
بنمد إيدنا ليك ..عايزين العطية
فين الهدية ياعمنا؟
كل الأمم مهدية
واللعبة لعبة شيطان
ليه الملايكة مايحشوش عنا الشيطان
ليه جدنا آدم ضعيف
وستنا حوا جميلة بتعترض
رفعت قدمها للسما
جابت عيالها وماتت
ياربنا
افتحلنا الجنة تحت
ادينا منها -أن شاله حتى- فرع واحد
نقضى معاه ويك آند قبل الموت
الصبر مفتاح الفرج
لا الصبر مات ولاجه فرج
نحن ابناءك اللى ساكنين نمرة 1 جنب بحرك والمحيط
نحن آخر النيل ..عـ اليمين وأنت طالع
وأحنا اللى بنزور الكنايس والجوامع
احنا اللى بنقيد الشموع
واحنا الدموع فى الضلمة والنوم عـ الرصيف
واحنا اللى بنبات حلمانين
بأى حاجة فى حتة رغيف
اعملنا حفلة هيفا..بتغنى
ريفرش عادى للنفوس
راضيين بتقسيمة الفلوس
حكام بتزرع خوف
ومحكومين بالسجن تحت الرجل
دوس
والزحمة طالعة مـ الحيطان
كل الجيران واقفة بتتفرج
حيران بالف فى ساقية
عطشان نفسى أشرب
أنت اللى خلقتنا نعطش نجوع
ياربنا
نظرة للى فى البدروم وفوق ..عـ السطوح
نظرة وحتة معجزة
الحزن محتاج معجزات
سيدنا محمد مات
وعلى اتقتل
سيدنا المسيح ..ابنك
دفع التمن وخلاص
ياربنا
ياخالق الناس
رحمتك
ومش مهم ..دلوقتى خالص
أن احنا ندخل ..جنتك!
عدد الردود 0
بواسطة:
يسري حسان
جميل
أحسنت ياأستاذ أحمد قصيدة جميلة
عدد الردود 0
بواسطة:
فتحي الصومعي/مدير مدرسة الشهيد عبدالمنعم رياض الثانوية بسوهاج
جنة الله .. فرع سوهاج
عدد الردود 0
بواسطة:
يسري حسان
الشاعر حر
عدد الردود 0
بواسطة:
فتحي الصومعي/مدير مدرسة الشهيد عبدالمنعم رياض الثانوية بسوهاج
الشاعر حر ما لم يضر يا عم يسري حسان