افتح قلبك مع د.هبة يس.. مشروع لمعالجة "الجفاف"

أرسلت (هاء.أ) إلى افتح قلبك تقول: أنا متزوجة منذ 4 سنوات، عن قصة حب، ولكن لا أدرى أين ذهب هذا الحب بعد الزواج، فبالرغم من أن زواجنا لم يمر عليه فترة طويلة، إلا أنى أشعر بجفاف عاطفى رهيب، وكأنى متزوجة منذ عقود وليس سنوات.

وتضيف هناء: كلما طلبت من زوجى أن يعاملنى بعاطفة أو أن يظهر لى بعض المشاعر والحب، قابلنى بوجه عابث وصوت جامد ويقول لى (ده كلام بنات مراهقات، إحنا كبرنا على الحاجات دى).

أتمزق من داخلى بين أن انفصل عنه بحثاً عن شخص آخر يقدر المشاعر ولا يبخل بها، ويمنعنى من ذلك خوفى على مصلحة أولادى، وبين استمرارى معه على هذا الحال المضنى المتعب جداً، خاصة أنى أخاف على نفسى، فأنا امرأة جميلة، وكثيراً ما ألحظ نظرات الإعجاب والاهتمام فى عيون الآخرين، وما يخيفنى حقاً هو أنى لاحظت أنى بدأت أتعلق بأى من هؤلاء لمجرد أنه قال لى كلمة حلوة.

صدقينى لم يتطور الأمر إلى أكثر من تعلقى الوقتى بأحدهم، لكنى سرعان ما أعود إلى صوابى وإلى بيتى وزوجى، لكن هذا حتى الآن، وأخشى ألا أقدر على السيطرة على نفسى مستقبلاً، أو تحت أى ضغوط.

الغريب فى الأمر أنه عندما يكون زوجى غير موجود_ لأنه كثير السفر_ لا أشعر بأى حرمان، ولا أفكر فى مثل هذه الأمور إطلاقاً، لكنه ما إن يعود حتى أشعر بقمة الاحتياج العاطفى، والذى أطلبه منه دوماً ويقابلنى بالصد، حتى إنى قلتها له صريحة ذات مرة (اهتم بى بدلاً من أن أبحث عن هذا الاهتمام عند شخص آخر)، لكنه اعتبر كلامى هراءً، ومجرد تخاريف ولم يعرنى أى اهتمام، أشعر أنى ضائعة ومشتتة وأشعر بخوف شديد من المستقبل وعواقب ما أنا فيه.. ماذا أفعل؟

إلى (هاء) أقول:
بما إنك قلتى إنك متزوجة عن حب، وأن ده كان من 4 سنين بس، فده معناه أن جوزك بيعرف يحب، وبيقدر يظهر مشاعره بشكل يوصل لك بوضوح، وإنه لسه مافاتش على جوازكم كتير عشان تملوا من بعض، ولا تزهقوا من محاولات التواصل مع بعض.

عشان كده ممكن العلاقة بينكم تكون محتاجة لشويه تجديد، أو أى نوع من أنواع التغيير، إلى يلمع الحب بينكم من تانى وينفض التراب إلى عليه، أغلب الناس اللى بتتجوز عن حب بتبقى فاكرة إن الحب بعد الجواز هايكون سهل زى قبله، لكن الحقيقة مش كده أبداً، لأن الحب واستمراره بعد الجواز محتاج لمجهود مستمر، وتفكير، ووقت، وصبر، حاولى انتى تكونى الطرف الإيجابى والمبادر فى الموضوع ده، لغاية ماجوزك يندمج معاكى ويحب أنه يبادلك نفس الأشياء، لازم تبذلى أنتى شوية مجهود زيادة فى البداية، لأن بطارية جوزك محتاجة شحن، فكرى كنتى بتعملى إيه قبل الجواز وكان بيعجبه أو بيبسطه؟، كنتى بتلبسى إيه؟ وبتتكلمى إزاى؟ وفى إيه؟، إيه اللى شده ليكى وخلاه يحبك؟، إيه اللى كان بيجذبه ناحيتك وبطلتى تعمليه؟، فكرى وخدى القرار انك هاتشديه ليكى من أول وجديد، لكن من غير ماتقولى ده صراحة، ومن غير ماتطلبى منه الحب والمشاعر بشكل مباشر.

ماعتقدش أن فى إنسان مش محتاج للمشاعر والعواطف، لكن الناس بتتفاوت فى الموضوع ده، فممكن جدا يكون حوزك من النوع اللى بيحتاج للمشاعر (بحساب) مش عمال على بطال زى ناس تانيه، عشان كده التواصل بينكم محتاج انك تفهميه و تفهمى احتياجه عشان تدخلى له من المدخل الصح و فى التوقيت الصح، على فكره أنا مش باحملك كل المسئولية، ولا بانفى دور جوزك فى الموضوع، لكن كل الى أنا طلباه منك دلوقتى انك تحاولى بكل طاقتك، و تستنفذى الأول كل قدراتك فى اجتذابه، قبل ما تفكرى تنفصلى عنه او تتعلقى بغيره، عايزاكى تتحملى انك تكونى أنت الطرف المبادر و المحفز للجو العاطفى فى حياتكم لفتره، لغاية ما تحسى ان جوزك بدأ يتجاوب و يتفاعل، و ساعتها هاييجى الوقت الى هاتجنى فيه ثمار الى أنت تعبتى علشانه.

أنا عارفه انك أنتى الى ممكن تكونى محتاجه لحد يبذل لك و يتودد اليكي، لكن معلش تعالى على نفسك شويه بس فى البدايه، لغاية ماجوزك يحس بان فى واحده (حلوه) و(حنونه) وبتحبه جنبه، ساعتها اكيد هايحاول يبادلك المشاعر، حتى من باب انه عايز يستمتع بالمزيد.

وفى حاجة تانية دايما باقولها للأزواج، كل ما تقابلك مشكله وتحسى أنها مالهاش حل وانها اكبر منك، الجأى للقادر على كل شئ على طول، ادعى دايما وماتبطليش دعاء (اللهم اصلحنى لزوجى واصلح زوجى لى وألف بين قلوبنا)، (ربنا هب لنا من أزواجنا وذرياتنا قرة اعين و اجعلنا للمتقين اماما)، واصبرى وشوفى بنفسك ربنا هايكرمك ازاى بعدها.

لكن نصيحة واحدة خايفة عليكى ابعدى تماما عن أى واحد بيفكر (يصطاد فى الميه العكره)، وبيحاول يستغل حرمانك العاطفى، ويرسم عليكى ويقولك الكلمتين اللى نفسك فيهم، عشان يوصل هو لغرضه اللى الله أعلم بيه، احفظى نفسك من الآخرين، سواء جوزك موجود أو مسافر، وانتى بتقولى انك بتقدرى تعملى ده فعلاً لما بيكون مسافر، اعتبريه ياستى مسافر على طول مؤقتا، لحد ما المياه تبدأ فى العوده الى مجاريها بينكم، وخليكى فاكره انه مهما كنتى متألمه من فقدان المشاعر و من الحرمان العاطفى دلوقتي، ده مش هايكون حاجه جنب ألم الندم و الحسره على أى غلطه ممكن ترتكبيها فى حق زوجك و فى حق نفسك، و ربنا يحفظك.

للتواصل مع د. هبه و افتح قلبك:
h.yasien@youm7.com