أحمد حسنى إسماعيل يكتب: أشوفكم فى الإضراب الجاى

باركولى يا جماعة أنا النهارده اتوظفت فى البريد بعد ما خت شهادة دبلوم قد الدنيا ومحدش قدى لانى بينى وبينكو خليت ابويا يبيع قيراطين أرض عشان ندفعهم هدية للنائب بتاعنا ماهو اللى ظبطنى فى البريد على حساب شوية شباب مفكرين نفسهم أحسن منى عشان جابوا درجات أعلى منى.

بس الحدق هو اللى دايما بيكسب والحمد لله بقيت اخد مرتب يعادل 4 موظفين فى أماكن تانية بس اللى غايظنى إنهم ليه معملوش إضراب زينا؟ بس إحنا كويس أننا عملنا الإضراب عشان مرتباتنا تزيد ونقدر نصيف فى شرم بقى ونروح نشوف العين السخنة احسن زهقنا من إسكندرية ومن ميامى الخاص، ومحدش يقولى اقتصاد مصر وبناء مصر ومصالح الناس الغلابة اللى اتضررت من اضراب البريد والكلام بتاع شباب التحرير.

ياعم فكك وأنا مالى المهم أنا وماليش دعوة بغيرى ويالا بقى سلام عشان ألحق أحضر كلمتين أقولهم على عيشتنا المتدنية وأوضاعنا عشان المصلحة تمشى واشوفكوا بقى الإضراب الجاى.