وليد عمر يكتب: حوار جرىء مع رئيس حزب الكنبة

- اسم حضرتك؟
سيد ساكت ليه
-الوظيفة؟
طبعا رئيس حزب الكنبة الديمقرطى ولا دى مش شغلانة؟
-طبعا يا أفندم شغلانه ونص.. بس سامحنى، هيا الشغلانة دى تأكل عيش؟
طبعا
- ما هى أهداف حزبك والبرنامج الخاص به؟
البرنامج معروف لدى الملايين وغنى عن التعريف:
إصلاح المجتمع وتطهير المجتمع من أذناب النظام البائد وتطوير التعليم وتوفير الرعاية الصحية السليمة لكل أبناء الوطن فى كل أرجاء المعمورة و....

-عفوا سيدى على المقاطعة، لاحظت منذ دخولى حزبكم الموقر أنه لا توجد مكاتب.. ما السبب؟

شكلك لست قوى الملاحظة، حضرتك ما شفتش كل الكنب الموجود، ما حاجتنا للمكاتب؟ نحن نجرى جميع لقاءاتنا على الكنبة ونأخذ قراراتنا من على الكنبة و....هقولك حاجة ننفرد بها هنا فى الحزب...

-ما هى؟
نحن ننفذ جميع قراراتنا من على الكنبه.
- معلش فهمنى.. إزاى بتنفذوا قراراتكم من على الكنبة؟
يا سيدى إحنا حزب الأغلبية أكتر من نصف الموظفين والعاملين بالدولة وكثير من فئات الشعب تدعمنا.. مش محتاجين نروح ولا نيجى.. شاركنا فى جميع المظاهرات والوقفات الاحتجاجية والاعتصامات وحتى الثورة.. شاركنا فيها هنا من على الكنبة.

- يا أستاذ "سيد ساكت ليه" أنت حيرتنا وبرجلت دماغى.. إزاى يا عم عملت كل ده من على الكنبة من غير ما حد من حزب حضرتك يروح حتى الاستفتاء ولا الانتخابات ولا حتى انتخابات النقابات؟
-
إحنا أصحاب عقيدة راسخة ......." الكنبة أولا "
- وطيب ومصر هتتغير من على الكنبة ولا أيه؟
طبعا لا.
-طيب الحمد لله طمنتنى يا راجل كنت فاكر إن الثورة لم تغير فكر الحزب بس ملاحظ إن فى تغيير.. ما هى توجهاتكم فى المرحلة القادمة؟
طبعا وفقا للمعطيات الجديدة والتغيير الذى طالب به شبابنا فى ثورة 25 يناير المباركة لازم إحنا كمان نتغير.

- ياه هيه دى الكلمة اللى أنا منتظرها من زمان.. أكيد هتغير اسم الحزب.
لا طبعا ........ هغير الكنبة وأجيب كنبة جديدة........
- روح يا شيخ منك لله ....... دا أنتم ملأتم البلد.