د . هانى أبوالفتوح يكتب: مصرْ طَالبَةْ مَليُونيةْ

مليونية جديدة تانية
وكل أسبوع مليونية
هَمْ مصر كُله بس فى مليونية
حَلْ مصر بَسْ فى كام مليونية
أَكْلْ مصر وشُغْلْ مصر فى مليونية
بس لازم مليونية م إللى هى
..........................
مليونية نغطى بيها المديونية
ومليونية نِحِلْ بيها مِيِتْ قضية
ومليونية نقضى بيها
ع الفساد والمحسوبية
ومليونية تانية لأجل البلطجية
ومليونية شعارنا فيها
سرعة العدل مطالب جوهرية
............................
مليونية دايرة بين
ثورة رايحة وثورة جاية
مليونية سمِِِِعْ عنها فلاح
كان بيزرع فى الغيطان
ساب زراعته وطِلِعْ ينِادى
قال تعالى سيبى شُغلك يا وِلِيَة
م النهاردة فى البلد ملايين كتير
يبقى إيه لَزمِة زراعتى
إفهمينى يا بهية
إِجرى بينا عالتحرير
الدقيق مابقاش دقيقنا
والفطير مابقاش فطير
كل يوم عَنْدِك بِنَاكُل عِيش وجبنة
هناك بياكلوا مِهلبية
.................................
كل عامل ساب مصانعه
و الموظف ساب مشاغله وقال كفاية
طول الشهر قاعد أحسب فى الماهية
أجرى عالتحرير وأَهْبُر بالألوف..
ليه الكسوف؟
دى بلدنا ودى فلوسنا
وفيه هناك كام مليونية
الشباب فى الجامعة جِهِزُوا واستعدوا
والبنات عالفيس بيقروا وقاموا رَدُوا
جَالهم الأخبار تقول أو رسالة من رسول
بكرة طالعين الميدان..
الكل جاوب قال أكيد..
م الفجر طالعين مأمورية
....................................
مصر كُلتها خلاص
م النهاردة فى مليونية
مصر طالبة المليونية
مليونية تحل مشاكلها العَصِية
ومليونية بعدها إقتصادها يرتفع للعالمية
ومليونية.. الأمن يرجع لها ويا الأمان
مش نخاف زى زمان
الكل حَسْ بمسئولية
حتى أهل الشهدا جايين عالميدان
يطلبوا التار بتاعهم
م إللى قاعدين فى الليمان
رد واحد قال وماله..
بس فكرك إيه يفيدك؟
سجنهم .. أوقتلهم
وألا تاخد من فلوسهم أغلى دية
..........................
بينا عالتحرير هَنِجرى
الميدان بينادينا..
إيدكوا يالا فى إيدينا
الشعب ياكُل مليونية
الطفل يرضع مليونية
المريض كل علاجه فى مليونية
البلد مابقتش محتاجة أى إيد تذرع وتبنى
وللا عاوزة إيد عفية
البلد محتاجة بس لمليونية!!
...........................
الكل راح عالميدان
الكل بيردد سوا ويا الأدان
مليونية.. مليونية.. مليونية
الشيخ بيخطب
والناس هناك م الحر واقفة مِستوية
.................................
واحد بيسأل مليونية ضد مين؟
جاوبه واحد قال أعوذ بالله م السؤال
شيء أكيد ضد التتار والمشركين
واحد تانى عَلْىَ صوته وقال
طيب قولوا لنا

فهمونا مليونية ويا مين؟
جاوبه واحد الميكروفون كان فى إيده
قاله إسكت يا حزين
إش عرفك بالمليونية
وللا تخطيطنا المتين
............................
المهم فى المليونية إن إحنا نيجى
كلنا متجمعين
مش مهم إيه هيحصل
مش مهم حتى تسأل
الأهم إن إنت تيجى
تقف لمصر وسط ناسها الطيبين
وِسْطْ أحزاب المعارضة
ويا الإخوان والسلف
وِسْطْ جموع من شعب واحد
وِسْطْ ناس مثقفين
وِسْطْ عمال.. وِسْطْ حتى الفلاحين
الأهم إن إحنا جينا نحيى دنيا ويا دين
والأهم الدنيا تعرف إن مصر لسه بخيرها
لسه فيها ملايين
وإللى دايماً بيحب مصر
أما ننادى لمليونية إلغى عقلك
من غير سؤال
تيجى جَرْى تقول آمين
................................
قلت أسأل مصر لازم
عاوزه إيه م المليونية وعاوزه مين؟
ردت المسكينة قالت أَسْكُتْ أحسن
مش كفاية الهم طال بيا السنين
مين هيسمع ومين يجاوب
ومين هيجمع ومين يحاسب
قلت قولى عاوزة إيه
قالت كان نفسى فى مليونية
يوم ما ثُرْتُوا فى يناير
من يوميها وقلبى طاير
والنتيجة مليونية للحرية
بس لسه نفسى طالبة مليونية
مليونية للعمل ويا الإنتاج
الكل لازم يشتغل
وبلاش كسل وبلاش إزعاج
إعملولى مليونية للصناعة
إصنعوا كل إللى أحتاجه
وإنتجوا أفضل بضاعة
وللا شوفوا مليونية للزراعة
إزرعوا أرضى
خلوا خيرها بس ليكم
وإلحقوا قبل المجاعة
مليونية للمحبة
تزرعوا أرضى محبة
وتنشروا خير إستخبى
مليونية للأمانة والأمان
هى دى أكبر قضية
إبعدوا الشر عنى
وإفتحوا كل البيبان
خلوا كل من دخلنى
يقول حقيقى
مصر جنة.. مصر أمن
مصر واحة من الحنان
مليونية للنظافة
نضفوا كل إللى فيا
رجعونى عروسة تانى
وإظهروا أجمل ما فيا
خلوا كل الناس تشوفنى
تقول صحيح
مصر أم الدنيا أهى..
مصر هبة النيل بهية
مصر هبة النيل بهية