اختلط الحابل بالنابل
والمفعول بيجر الفاعل
الثورة يا مصر بقت مولد
مقتول بيعزى فى القاتل
مية ألف قبيلة وعشيرة
وده خارج منها وده داخل
ولكل فريق تلقى منصه
وده يسكت، وده بعده يواصل
واللى يغنى واللى ينظّر
ويقول، أو يحلف مش قايل
مسلم قبطى ولا شيوعى
ضاربها صرمه ومش سائل
موالى، معارض وبشدة
أو وطنى محايد متساهل
كله بيزعق على كله
والمركب فى الريح تتمايل
باقيلها نفخه وسلملى
عالثورة، وبعدين نتقابل
فى صومالكو أو حتى عراقكو
وغيطانكو نزرعها قنابل
متفوقلى يامصرى وتصحالى
وركز فى الفايدة وكون عاقل
بهدلة مبارك مش غايه
والعسكرى ليه منه شايل !!
العيب مش مين اللى بيحكم
العيب فى نظام كله فاشل
خلّص دستورك ونظامك
ومايكنش ميزان عدلك مايل
يا مصرى الإيد اللى بتزرع
أو أيد الجندى والعامل
تقطعها، حتندم ولا تلقى
غير الشامت فيك والعازل
ضم هلالك لصليبك
والشارد يرجع، لو طايل
وخير مصر يعُم ولا يبقى
ناس واكلة وناس بتتاكل
مشاركة
اضف تعليقاً واقرأ تعليقات القراء
مشاركة
