مع احترامى للجميع
من أول الطفل الرضيع
لحد أكبر واحد فيكِ يا مصر
مع احترامى لكل عصر
ولكل قصر
ولكل خرابة، فيها قتيل مات
وماحدش سمعله صوت
مع احترامى لكل نصر
ومع احترامى للتابوت
مع احترامى للتخين
وللرفيع
للى حافظ على حقة
وللى ضيّع
مع احترامى للمبادئ
ولكل واحد فيكو صادق
مع احترامى للمنافق
وللنضيف
مع احترامى للى سارق
وللشريف
مع احترامى للسكوت
مع احترامى لأى صوت
مع احترامى للسلام
وللنفاق
مع احترامى لأى عهد
واتفاق
مع احترامى للمصداقية
وللعروبة المنتهية
مع احترامى لكل طامع
مع احترامى للوريث
مع احترامى لكل واحد
طافح الكوتة ف ترابِك
ومع احترامى للرئيس
مع احترامى للكبارى
والشوارع
والحارات
مع احترامى لكل دسكو
والنوادى
والبارات
مع احترامى للى اتزلو سنين كتار
مع احترامى للى فاكر نفسة حقق انتصار
مع احترامى لكل عامل باليومية
وللى بايعين القضية
مع احترامى للطهارة
وللمرتب اللى واكلاه البرومة
مع احترامى للوزارة
وللحكومة
مع احترامى للمطاوى
وللدبابات
مع احترامى للسرير
وللخيمة ف ميدان التحرير
مع احترامى للسجاير
ولـ خمسة وعشرين يناير
مع احترامى للى لابس توب مقطع
واللى لابس توب حرير
مع احترامى لـ أحمد عز
والمغربى
وحبيب العدلى
مع احترامى للى خايف
وللجرئ
ولوزارة أحمد شفيق
مع احترامى للإخوان المسلمين
والإخوة السلفيين
ومع احترامى لـ وائل غنيم
ولأى حد عايز كراسى
مع احترامى للى راسى
وللمادة التانية فى الدستور
مع احترامى لجيش بلادنا
ولكل جامع وكل دير
مع احترامى للصوص
والمدبوحين
مع احترامى للعساكر
وللشويش
مع احترامى لكل واحد يستحق
ولكل واحد مايساويش
مع احترامى للدراسة
وللسياسة
ولأى واحد فيكو أيا كنتوا مين
مع احترامى للى فايق
ومع احترامى للحشيش
مصر لازم
لازم
لازم
يا خوانا تعيش
مشاركة
اضف تعليقاً واقرأ تعليقات القراء
مشاركة
