أنا طول حياتى
عاشق وهايم
بوحد فى دايم
واحمى فى عـِرضك
وامشى فى أرضك
والفلف وادُور
مسحراتى
وحافظ حيطانك
صخورك وحجرك
وريحة غيطانك
بخورك وشجرك
ومين اللى هجرك
وحافظ دروبك
ولحظة غروبك
بغزل حروفى ليكى بدور
مسحراتى
وماشى أنا بتغندر
بسافر وعافر
وهاجر كتاجر وشاه بندر
فنان وراسمك على صدرى
خطوطك شطوطك
خريفك وصيفك
وريفك وبندر
دا ثانية بعيدك تساوى شهور
مسحراتى
وامشى ف شوارع
واحضن بيوت
بصبر وعزيمة نعدى نفوت
عارف الملامح
وقلبى مسامح
وحافظ الوجوه
ومين يا صبية
يعشق ترابك
وفيكى يتوه؟!
مسحراتى
أنا طول حياتى
عاشق عيونك
وربى يصونك
وعمرى يا طاهرة
ما أفكر أخونك
أروح المطارح
دا حبك وطارح
فى قلبى بذور
مسحراتى
وماشى فى ليلك كله أمان
يا كل الأمومة ونبع الحنان
رمشك سحرنى وسحرك فريد
وابنك يغنى فداكى وشهيد
دا انتى ياحلوة أميرة البحور
مسحراتى
وماشى بنادى
جوا بلادى
يارب يا هادى
خلى المكسل يصحى يقوم
اصحى يا سيد انت وجلال
ابنى وشيد ورزقك حلال
وصلى لربك واسجد وصوم
وانتى يا قاهرة
يا ظاهرة يا طاهرة
قامت ولادك وهبت تثور
مسحوا دموعك قادوا شموعك
وجرجس وأحمد بيبنوا الجسور
مسحراتى
ماشى بطبلة بضرب برن
عنتر يا عبلة عاشق يحن
ترابك سماكى
نيلك هواكى
وحَبة حبة
يا حلوة يا شابة
الله محبة
شوفى نصيبك
هلالك صليبك
ولا عين تصيبك
حلاوة شبابك
بيفتح فى بابك يقرا كتابك
يلاقى السماحة بتطرح زهور
وقلبى اللى عشقك مزهزه بنور
مسحراتى
أنا طول حياتى
ماشى فى أرضك
بلفلف وادُور
صورة أرشيفية
مشاركة
اضف تعليقاً واقرأ تعليقات القراء
مشاركة
