رامى محمد زين يكتب: قالولى ما تسامح

قالولى ما تسامح.. قولت سامحونى
مارحمنيش ليه أمبارح أنا واللى خلفونى
من زمان ف بلدنا سارح هو وعصابته بيحكمونى
ده أنا ياما شوفت سنين

قالولى ما تسامح.. قلت ليه
هو أنا كنت يوم صعبت ع البيه
ده ياما شرّبنى المر بأيديه
هو والمسئولين

قالولى ما تسامح.. قلت ع الجوع
ولاّ على المر اللى شربته زمان م الكوع
ولاّ على صوتى اللى عمره ما كان مسموع
ولاّ على إنى ما اتعاملتش زى البنى آدمين

قالولى ما تسامح.. قلت ع الفلوس
ولاّ على البلد اللى اتباعت بأسلوب مدروس
ولاّ على إنى كنت عايش ف بلدى محبوس
ولاّ على عذابى مع الروتين

قالولى ما تسامح.. قلت على دخولى المعتقل
ولاّ على إنى عمرى ما كنت بتخيّرو بتسأل
ولاّ على أخويا اللى ف المظاهرات أتقتل
ولاّ على قانون الطوارئ

قالولى ما تسامح.. قلت على ذلتى
ولاّ على الكيماوى اللى سمم أكلتى
ولاّ على تزوير إرادتى وتجاهل شكوتى
ولاّ على إنى ماكنتش معاك فارق