(1)
- وعشان نتوه فى السكة شالت من ليالينا القمر –
الدم نازف من شفايفه
ومن ودانه ومن عنيه
وبيادته فردة فى رجله
والتانية جمب سلاحه
تحتيها العلم فى مكان بعيد
خطوة كمان
والطلقة تخرج عن شعورها
وتستقر فى جبهته
وأبو شعر أصفر بابتسامة
ح يستعد لصيد جديد
(2)
- خدنى المراكبى وعدانى ورجعت بالقمرة الليلة –
آن الأوان
الوحش متجوع بقاله سبع سنين
والرعب غير لون عنيك وشقق اللحم الطرى
مشهد رهيب
لما مسك بضوافرة شطين القنال
والأمهات السمر زعردوا فى العزا
(3)
- دا جمب دا جمب دا جمب دا مصر الجميلة اللى زى القمر-
كان نفسه يقدر يستخبى هناك بجد
مع أنه عارف
إن أرض المعركة مبتسامحش
لكنه راهن ع النجاة
واديه طفا
قدام بيبان المحكمة
"المتهم حاضر يا أفندم والشهود متأكدين"
أنا كنت موجود وقتها
بمسح آثار الدم من على جبهتى
واصبغ ملامح قلبى
بشموخ العلم
الجمل الاعتراضية من أشعار الأبنودى، فؤاد حداد وأمين حداد على الترتيب
