راضى على حسين يكتب: دموع الشوارع

يا شوارع يا مياديــــــن = قولى الخاين فيكى مين
مين المخلص فيكى حقيقى = ومين الواخد بالملايـيـن
مين معاه النيه عمـــــار = ومين الشر فى قلبه دفين
مين بيرش الحزن علينا = رغم الحبس وهوا سجين
لسا ديولهم قاعده بتلعب = جوا جحور بسموم تعابين
اصحى ياشارع قومى يا بيوت = اوعوا الفتنه بنينا تفوت
لمَا الشعب يعيش الفرقة = يلقى الحلم معاه بيمـوت
جوا بره فيه أشــــــــرار = عايزه بلدنا ما فيها القوت
يا شوارع يا طريــــــق = مين بيضحى بدم شقيق
مين الجاى يكسر بخاطرنا = ونفسه بلدنا تخش غريق
مين بيزرع خير ومحبه = ومين بيلهلب فيكى حريق
اوعوا فلول الغدر تبان = تنشر فوضى بألف فريق
لو جه حابل ويَّا النابــل = تبقى الثوره ماليها بريق
يا شوارع يا حـــــارات = مين البايع فيكى شعارات
مين بيفكفك لينا صفوفنا = ومين بيرفع صوت نعرات
يا شوارع يا مـــــدارس = جيشك صاين عهدك حارس
أحسن جند الله فى الأرض = وقال دا شهيدك هوا الفارس
ليه الكل صبح يتفلسـف = عامل نفسه بس الــدارس
واللى جاى زى الحربايه = وكان لكل الكدب يمارس
مين بيغازل حلم حياتـنا = وجايب خنجر فينا وغارس
يا شوارع يا مياديــــــن = قولى الخاين فيكى مــين