رؤوف عبد الله يكتب: شوفتوا العجب يا ولاد؟

شوفتوا العجب يا ولاد؟
نورهم طفى ونارهم بدت تنآآآآد.. ما فيش رصيد بقى يسمح فى كلام بقى يدبح وكرباج يضرب والعسكر بتأيد الجلاد.

شوفتوا العجب يا ولاد؟
بقى فى صباع علينا بيطلع يهدد ويخوف كل من يسمع، ولو قولنا محاكم العسكر أدامهم تلقاها تتسكر وعلينا بقت تزداد.

شوفتوا العجب يا ولاد؟
أبو دبورة بيضرب سلام للقاتل، والمأمور يدعيهم على عشا فاخر، وإحنا ناخد بالجزم ويا تموت جوا منا الذمم يا نروحوا على آى بلاد.

شوفتوا العجب يا ولاد؟
القاتل بيتعالج فى مستشفى ملوكى وسرير متحرك على حكم كروكى، والمجنى عليه لو قال دى حقوقى عيشة أهله هتبقى سواد..

شوفتوا العجب يا ولاد؟
طب شوفتوا حكومة الثورة ويا العسكر عاملة مناورة توقع زيد فى عبيد، علشان تفسد آى مظاهرة وآهو بالمرة على مطالبنا نقفوا حداد.

شوفتوا العجب يا ولاد؟
شوفتوا الشعب الغلبان شال الحية وجاب تعبان، عمم نفسه بكيفه وراحته رضى بالهم ونسى مصلحته أخد الدنيا عناد فى عناد.

شوفتوا العجب يا ولاد؟