هند أحمد تكتب: حلم التغيير

هو إمتى بجد الناس هتحترم بعض؟.. إمتى صوتنا مش هيبقى عالى؟
إمتى الشخص هيحترم إنسانيته؟!.. إمتى هيبقى فى فى كل كلامنا ومعاملتنا من فضلك ولو سمحت؟
وإمتى الإعلام هيحترم الناس اللى بتتفرج عليه، ويبطلوا المهازل اللى بنشوفها دايما قدامنا؟
وليه بقى كل يوم كل برنامج جايب ناس بتتخانق مع بعض؟!.. ليه بيشوهوا صورتنا قدام العالم؟
ليــه مابقاش فى أى احترم بينا؟!.. ولا حتى بقينـا بنسمع لبعض وساعات كلنا بنبقى ضد بعض.
ودلوقتى بقى وصلنا لمرحلة إننا كلنا بقينا نخون بعض..
فتلاقى من يصف 6 أبريل بالخونة، وآخر من العلمانيين يصف السلفيين بالخونة.
والبعض يقول بكفر العلمانيين والليبراليين.. ومش دا المهم.. المشكلة بقى والأهم إن موضوع إننا نخون بعض دا بقى موضة
إزاى بقى كل واحد مش عاجبنا طريقة أسلوبه أو تفكيره نقول عليــه دا خاين؟

أومال فين بقى الديمقراطية اللى إحنا بنطالب بيها؟ ويا ترى إحنا فاهمين الفرق بين الحرية والهمجيــة؟! ولا دى بالنسبة لنا حاجة عادية؟

بجد نفسى أقول من قلبى ولو مرة واحدة إن مصر قبل 25 يناير غير مصر بعد 25 يناير.

ياترى إحنا هنتغير بجد وهنبقى بنحترم بعض فعلا ونقدر معنى اليمقراطية اللى إحنا بنطالب بيها؟
ولا إحنا مش ناويين ومش هنمشى وهنفضل ماكنا واقفيــن؟
َأصل أنا الصراحة بقيت خايقة وبقيت شايفة إننا بنرجع للخلف در.

ومع ذلك كل ما أصحى من النوم مع بداية كل يوم، بيبقى عندى أمل وبقول بكرة هنبقى أفضل.
ويا رب يكون رمضان بداية خير علينا، وبداية تغير لينا فى معاملتنا وسلوكنا وأسلوبنا وحتى فى علاقتنا مع ربنا.
ويمكن بعدها نقدر نقول من قلبنا إننا بقينا فعلا فى عهد جديد.