حمدى يوسف عمار يكتب: دعوه للحــُـــب

إفرد إيدينك يا ابن عمى ومد الكفوف
لجل تعلى لفوق وعيالك تشوف
الغلابة والطيابة وطالبين المحبة ألوف
واقفين من كترهم ف هرجلة
يحلموا بمعروف
تشوفهم من غِناهم
يطلبوا المحبة ف كسوف
عايشين ف حيرة وقلق
من بكره ماليهم خوف
لا لقمة زايدة حداهم
ولا حتى هدمة صوف
لو جِه ضناك ف ليلة
يسألك مصروف
إبقى افتكر فيه ألف زيّه
ف حاجة للمعروف
لا حيطة تدارى
ولا هدمة تستر المكشوف
بيوتهم شوارع
فى مجتمع عليه مأسوف
لا يوم حس بشقاهم
ولا حتى لعن له ظروف
ولا قام ف ليلة وسارع
يغيث فقير ملهوف
الكل باصص لنفسه
خيره ع الغلابة حروف
كرشه قيراطين منفوخ
والتانى يا ولداه ديك بريش منتوف
مُطارَد ف الشوارع
يقاسى م العذاب ألوان وصنوف
كلنا على دنيتنا مجرد ضيوف
إكرامه واجب علينا
لجل نحيا جدار مكتوف
دا العلة فينا وعلينا
والمولى فوق بيشوف
يا خلق عمر الوطن ما كان
على خصرنا علم ملفوف
ولا أنجر فتة مليان بلحم خروف
يهبش منه القوى ولا بخيل حلوف