د.هانى أبوالفتوح يكتب: يَا مِيِتْ أَهلاً ومِيِتْ سَهْلاً

بيقولوا جَاى لنا ضيوف
وضيفنا عزيز مفيش زيه
يا مِيِتْ أهلاً و مِيِتْ سهلاً
تعالوا كُلِكُوا حَيوا
......................
تعالوا عَلقُوا الزينة
وإيدوا الشمع حَوالينا
خلاص الدنيا هَتْنَوَّر
ومن خِيرُه هَيسقِينا
.....................
بيقولوا كُلها كام يُوم
ونِحيِى نِهارُه مع لِيلُه
وقرآنه خلاص هنقوم
فى آخر عَشَرَة نِدْعِى لُه
وفيها الدنيا بِتْنَوَّرْ
وطول العَشَرَة بِنْدَوَّرْ
على ليِلَةْ
ونَفْرَحْ لما نِحْيِيها ونِلْقَاها
نقول الله... الله أكبر
دى ليلة القَدْرْ
دى ليلة العُمر
سبحانه من خلق صَوَّر
نشوف النور وقناديله
...................
يارب الكون
خلقت الضيف وسَميِتُه
وفى القرآن كتبت آيات
عن فضله ونِسْعَدْ لما رَدِيته
وطُولُه فى السنة شَهر
بِنِفْرَحْ لما بيجيينا
و نِزْعَلْ لو يِوَدَّعْنَا
ونِدْعِى لو يِطُول أكتَر
ونبقى إحنا إللى عنده ضيوف
ويفضل هوه ويانا.. هنا بِيتُه
.....................
يارب العرش
خلاص الضيف على بابنا
بِنِفْرَح لما بيخبط
ونِفْتَح له هنا قلوبنا
نقول إدخل ولا تخَبَطْ ولا تسأل
بقالنا طول سنة كاملة بنستنى
ونفتكرك بأيامك ونتمنى
ونفضل ندعى ياربى تِوَصَّلنا
لباب رمضان عزيز غالى هنا جَالْنا
يا أهلاً بيك
يا مِيِتْ أهلاً و مِيِتْ سهلاً