فيسبوك
واتساب
لجل أرجع تانى شربت من نيلك
أسرح ف ضى القمر أعزف واغنيلك
أسهر ف ليل السمر تنور لى قناديلك
إن جار على زمانى أجرى وأشكيلك
أرتمى ف حضنك ..أفضفض وأحكيلك
أسمع ف دقة قلبك غنا مواويلك
خيرك على ياغاليه ولحم كتافى من طينك
روحى فداكِ.. فدا قرآنك وإنجيلك
شايفك ف ليل الغربة..
رافعة ف السما جبينك
والكل روحه ف كفه..
شايلها فدا عيونك
شايف سنابل قمح
مخضرة بالفرح فدادينك
وأرض سمرا وعفية
شاربة من عرق نيلك
فوق الخلايق شايفك..
ناشرة جناحينك
ف البر ترمح بالمدى خيلك
ف البحر بحاره
تغنى على لحن خلاخيلك
وفوق زهور الجناين
يرفرف ف الهوى طيرك
