هشام حسن: أنا محتار

أنا محتار وف الحيرة سافرت بلاد
أقول أنا أيه؟
أنا طيب وحقانى وراضى لغيرى باللى أرضاه
ومش عايز غير المساواة

وتبقى بلدنا مافيهاشى ولا غلبان
ولما نقر جميعا بمبادئ حقوق لإنسان

حشوف الشمس منيمة الشجر ع النيل بلون الظل
وح أتنفس هوا الحرية جوايا بريحة الفل

وهاسكت ليه..... أقول أنا أيه؟

أنا عايز أنام وأصحى وألاقى الشعب ربه هداه
ونامله يومين
وسابنى أعيش وآكل وأشرب ولو ساعتين

دانا ياخواننا مش رافض إن بلدنا نعدلها
لكن خايف لتفلت منا وما نعرفشى نعدى لها

دانا ساند حجر المقطم بكتافى
وبشمالى قافل حدودنا ف السلوم
وبيمينى ماسك المعبر وأنا حافى
ولا عارف أدوق للحظة طعم النوم

وأنا ساكت.... ومش طالب غير شوية فول
ولا أقول؟

إن النظام ماوقعشى ودا كله كلام فاضى
وكل الدنيا خربانة وبايظة كمان ودا العادى

وأنا مش حمشى م التحرير لحد ماتنجح الثورة
وأشوف دولة
وأشوف حاكم.. وأشوف دستور
وأقول رأيى وأقف ف الدور

وأختار اللى قلبى وعقلى يقوللى عليه
أقول أنا أيه... أقول أنا أيه