فيسبوك
واتساب
آسفين آسفين يا رئيس آسفين = بنقولها صريحة فى الميادين
آسفين إنى صبرنا علـيك = سبناك تحكم فينا سنــين
سبنا بلدنا الحلوة الغالية = تبقى ضحية وفيها تايهين
سبنا الوطن الطاهر ينزف = غم وهم دموع وأنــــين
شفنا الذل بشكل مجـــسم = سَلـْب ونَهْب وجهل لعين
شفنا الحلم معانا متكتـف = صوت الحق بيقى سجين
آسفين ألف ومليون مـرَّة = سبنا قمرنا بيبكى حزيـن
ناس مش لاقيه رغيف العيش = وناس فى الشهر تاخد ملايين
ناس فى العشه وجوا مدافن = وناس بتسقع فى الفدادين
كانوا عايزنها تبقى وراثه = خانوا العهد وألف يميـن
كانوا يشوفوا الباطل يرقص = عزفوا اللحن لظلم مبـين
إللى يوافق وإللى منافق = تحت القبة يقولوا أميــن
خلوا الشعب عايش متخدر = باعوا دهبنا بسعر الطين
لحم حمير وقمح مسرطن = كرهوا بلال وجرس برنين
عبُّوا الوهم باعوه فى قزايز = قتلوا الفرحة فى قلب جنين
مهما شكينا ومهما بكــينا = يقولوا البنك مافهش خزين
"أسفين"عايزه تعيد أيامك = ناقص يقولوا احنا الخاينين
جايين فوق الجرح يدوسوا = بالتأكيد فيه سر دفـــــين
آسفين إحنا حقيقى بجـــد = سبنا بلدنا فى إيد تعابيــن
حسنى مبارك
