خلى الميدان.. صاحى
خلى الميدان.. صاحى
الثورة أمى.. والميدان أبويا
وكل واحد حر.. جوه الميدان يبقى أخويا..
أنا اللى قالوا عليا مواليد يناير..
نزلت من بطن الغضب.. ثاير..
ولسه واقف فى الميدان ددبان..
بحرس ميدانى.. من الخسيس.. والجبان..
بحرس ميدانى.. من الفلول.. والديول..
وصوتى هو.. درعى.. وسلاحى
خلى الميدان.. صاحى
خلى الميدان.. صاحى
ثورتنا صاحية لحد.. يوم القيامة
وجوه قلب الميدان.. مليون علامة
مليون دراع فـ دراع.. وكف فـ كف
عملنا دايرة.. وسور.. وخيمة.. وصف
بايتين جوه الخيام.. وعنينا سهرانة
والسهرة علشانك.. يا مصر صباحى
خلى الميدان.. صاحى
خلى الميدان.. صاحى
فيه دم طاهر سال.. وساب مرسال
قال حقى متعلق.. فـــ رقبة الأندال
مين اللى قال إنى.. مشيت ونسيت
دنا لو هاسيب الميدان كأنى سبت البيت
حق الشهيد فى الميدان.. وأنا عـ الميدان حارس
فيه اتولدت.. ومنه بيبتدى كفاحى
خلى الميدان.. صاحى
خلى الميدان.. صاحى
