أحمد توفيق يكتب: أنا إبريلى!

أنا إبريلى.. أنا إبريلى..
ثائر مصرى مش برازيلى..
شفت التوريث قلت كفاية !
قطعوا لسانى ولسعوا قفايا..
وأما لقيت الشعب معايا..
قلت أسيب إبريل وأختار..
شهر يناير يبقى دليلى..
أنا إبريلى.. أنا إبريلى..
ثائر مصرى مش برازيلى..
لكن بعد الثورة لقيت..
إنى الضيف مش أهل البيت..
قلت يا عسكر برضه كفايا..
قطعوا لسانى ولسعوا قفايا..
واتهمونى بإنى عميل..
خنت النسر وخنت النيل..
كانت أول مرة بكيت..
هو ده سهل عليا يا ناس !
بعد ما سبت الذل ورايا..
يومها نزلت وصاحبى معايا..
خدت رصاصة غدر فى قلبى..
واستنيتهم ياخدو عزايا !
هو ده سهل عليا يا ناس !
بعد ما ثرت مع الثوار..
يتقال إنى عميل لحماس!
ليا أجندة وصاحب كاس..
لأ يا مشير.. لأ يا عساكر..
امسك تانى تاريخنا وذاكر..
اقرأ بصوت مسموع للناس..
إننا كنا الخطوة الأولى..
فى درب طويل..
إننا كنا الحلم الوردى..
لجيل ورا جيل..
اقرأ وذاكر..
إن يناير طفل جميل..
طالع من أحضان إبريل..
أنا إبريلى.. أنا إبريلى..
ثائر مصرى مش برازيلى..