راضى على حسين يكتب: غلطة عمرى

مش قادر أسامح نفسى
إنى عشت العمر دا كله
معاك مخدوع
أصل النية معايا عمار
كنت بصدق كل كلامك
كل وعودك
كل عهودك
كل ما شوكك كان يجرحنى
أقعد أدور على أعذار
مهما يقولوا يعيدوا عليك
ألقاك ترفع ليا إيديك
أتاريها إشارة
بتدى قرار
حتى الضحكة جوا عنيك
طلعت غش
لابس ألف قناع ع الوش
وكل الصورة لقيتها مرار
مش قادر أسامح نفسى
إنى عشت العمر دا كله
معاك مخدوع
رابط حلم حياتى
ف باكر
مكنتش فاكر
إنى مُخى كان مندار
بس عرفت حقيقى متأخر
إنك بتمارس
كل فنون الكدب
وكنت واخدنى معاك لطريق
ومافهش رجوع
وإنك بحر من الأسرار
بتهوى إنى مواطن بلدك
ينام ع الهم
ويلبس غم
ويصحى الصبح يلاقى الجوع
مش قادر أسامح نفسى
إنى عشت العمر دا كله
معاك مخدوع