راضى على حسين يكتب: أنا مصرى

أنا مصرى وبيكى بفاخر
دا ترابك مِـسك مباخر
لو حلمك راح لبعيد
لو بحرك مُوجُــه شديد
أنا حضنى ليكى بواخر
***
أنا قلبى بيكى اتعلـَــق
وأنا لسا جنين بتـْخـَـلَـَّـــق
أنا طيرك وإنتى العش
أنا ضحكك فوق الوش
يا ما قلبك فيه حنية
وسليمه معاكى النية
وهواكى سوبر فاخر
أنا مصرى وبيكى بفاخر
**
أنا ابنك كان مجروح
والخوف جواه متسرب
كان عايش من غير روح
ومهاجر فيكى متغرب
يا ما كنت زمان مكسور
مـِتهَمش أنا فى الضل
مش لاقى طريق وجسور
ولا إمتى الشمس تهل
مش عارف ليل ولا آخر
**
أنا قلبى عاشقك حرة
وأنا لسا فى حبل السرة
شوفى دمع وحزن حبيبك
هلالك ويا صليبك
مش ممكن نبقى أواخر
أنا مصرى وبيكى بفاخر
**
دلوقتى بقيت أنا حر
والفرحه جات من تانى
دا سفينتك رايحة تمر
رافعة الأعلام وأغانى
فوق موج البحر الزاخر
أنا مصرى وبيكى بفاخر
**