د.هشام منصـور يكتب: يقطع الغربـة وسنينها

ما يتعرض له المصريون بالخارج شىء يندى له الجبين من الخجل والكسوف وقلة القيمة، إذا أردت الحديث فحدث ولا حرج عن الإهانة والبهدلة والتلطيم فى كل حته شوية ومن كل مسئول شويتين، وحكاية المصريين بالخارج حكاية، وأنت لا تكاد تستمع لأحد منهم إلا وتكتشف أنهم غلابة، يكاد ينطبق عليهم المثل اللى بيقول "رضينا بالهم والهم مرضاش بينا"، حالهم لا يسر عدو ولا حبيب ولغاية امتى حيفضل حالهم كده... الله أعلم!! وتسألنى أقولك يابـا دول مش غلابة دول أغلب من الغلب ومنه لله اللى غلبهم.


وبالرغم من أن تعداد المصريين بالخارج تقريبا عشرة ملايين مصرى وتحويلاتهم حوالى عشرة مليارات دولار سنويا وبالتالى يشكلون مصدرا مهما من مصادر العملة الصعبة ورافدا أصيلا من روافد الدخل القومى للبلاد خصوصا وفى ظل هذه الأوضاع المنيلة بنيلة فى مصر، إلا أن الحكومة كالعادة ودن من طين وودن من عجين، وأقولك ايه يابـا هى الحكومة فاضية لحد جوة عشان تبص على اللى برة! أقول إيه بس يابـا يقطع الغربة وسنينها.

ومع أن معظم العمالة المصرية تتركز فى المنطقة العربية وبالتحديد فى دول الخليج التى من المفترض فيها حسن استقبال ومعاملة المصريين وحسن وفادتهم... ولكن وبكل أسف هناك تعمد واضح لإهانة المصريين، وأصل الحكايــــة أن المصريين برة يتـامى مفيش حكومــة بتسأل عنهـــم ولا بتسأل فيهـــم، وأقولك ايه بس يابـا أصل اللى ليه ضهر ما ينضربش على بطنه والمصريين برة يانـاس غلابـة!!!! يقطع الغربة وسنينها.

ومما لا شك فيه أن طريقة سفر العمالة المصرية بداية من نظام الكفالة ومرورا بسوء أوضاع العمالة والتمييز والفصل التعسفى والاضطهاد والتعذيب وضياع المستحقات المالية والحرمان من الرعاية الصحية ونهاية بسوء معاملة السفارات المصرية للمصريين فى الخارج حاجة توجع القلب ومنهم لله اللى وجعوا قلبنا، سفارات ايه بس وزفت إيه هى دى سفارات دى علل عملنها مخصوص لوقف حال المصريين بالخارج إلهى يوقف حالهم البوعدة.

حد بس يقول ليا هى السفارات دى أبعاديات للسفراء والقناصل؟؟ عايزين نفهم بس عشان الواحد منا يعمل حسابه وهو داخل لأى سفارة يبوس إيد السفير وراسه وبالمرة يفوت على الموظفين والعمال يبوس إيديهم واحد واحد!!! وبعد كده الواحد يبوس إيده وش وضهر إنه مسك إيد السفير وبسها ومش مهم بقى أن كانت المصلحة انقضت ولا لاء!!! الكيل طفح بالواحد منكم لله، آه يا بلد يا اللى مطرمخة على الفساد مش فاضل غير إنه يخرم عنينا.
ختاما أقترح إنشاء مجلس منتخب لكل جالية مصرية فى الخارج من أبناء هذه الجالية تستطيع أن تعبر عن هموم تلك جالية بالخارج ومشاكلها، ثانيا أن يتم إلغاء منصب السفير والقنصل من كل سفارة وقنصليه لنا فى الخارج مع الإبقاء على الموظفين العاملين فيها بعد إعادة تأهيلهم، ثالثا أن تكون للمجلس المنتخب صلاحيات السفير فيما يخص حقوق العمالة وأوضاعها والتفاوض مع أصحاب العمل وتتولى تمثيل الدفاع عن المصريين أمام جهات التحقيق والمحاكم، رابعا أن نكتفى بتعيين دبلوماسى ممثلا لوزارة الخارجية والدبلوماسية المصرية لرعاية الشئون السياسة للدولة فى الخارج، خامسا أن تسلم مبانى السفارات ومكاتبها والقنصليات لتلك المجالس المنتخبة فيما يخص العمالة المصرية ويترك لممثل الخارجية بقية المكاتب.

ياعالم القنصليات دى مش معمولة لبهدلة ومرمطة المصريين برة كفاية بهدلة الغربة فيهم، إحنا مش عايزين قناصل لنا فى أى حته، كفاية بقى مرمطة فى الناس... ويقطع الغربة وسنينها والسفر واللى شاروا بيه.