فيسبوك
واتساب
ماكنتش كلمة لأ
قادرين نقولها فى يوم
ولارفع راية الحق
ولانصرة المظلوم
30 سنة فى الغُلب
والحيرة ووجع القلب
وادفع المعلوم
رشوة وفساد إدارى
وخراب مالى الذمم
من كتر الظلم رجعنا
بقينا ف آخر الأمم
إتهانا فى كل حتة
ومرضنا مالوش روشتة
تخفف الألم
مبارك عاش فى جاهُ
وعشنا ع الرصيف
80 مليون وتاهوا
مش لاقيين الرغيف
والظلم إن حدّوا زاد
وطال كل البلاد
ماتلومش على الضعيف
اللى خرج وشايل
همه فوق كتافه
وصرخ بأعلى صوته
م اللى عاشه وشافه
وقال مفيش حلول
لازم عهدك يزول
وهز الكون هتافه
وبعد مابقيت ياريس
فى موقف الضعيف
وبان مين الحرامى
ومين هو الشريف
ولعنة التزوير
رجعت عليك ياكبير
وعلى حكومة نظيف
جاى وعايزنى اسامحك
وأصفى قلبى ليك
كان ممكن قبل الدم
مايلوث أيديك
لكن دلوقتى آسف
حاولت لكن مش عارف
أغفرلك ماضيك
ربنا هو اللى يغفر
وقادر يرحمك
عادل دايماً فى حكمه
وعمره مايظلمك
ومادامت فيك حياه
إرفع إيديك لله
وعفوه يشملك
صورة أرشيفية
