د. هانى أبوالفتوح يكتب: فَدَاكِى يَا مصرْ!

مصر.. كلمة وحروف بتنكتب
فينا إللى يكتبها بقلم رصاص
وفينا إللى يكتبها.. بالحبر
وفينا إللى يكتبها بمية دهب
وفينا إللى يكتبها بروحه ودمه
منقوشة حروفها فى قلبه وعقله
وتكويه جراحها بنار من لهب
.................................
وفينا إللى قلبه عليها حجر
وفينا إللى قلبه عليها حديد
وفينا إللى قلبه لسه خشب
وفينا إللى قلبه عليها انفطر
ومليان حنين برغم السنين
رغم الكفاح ورغم التعب
تشوفها فى لونه وعرق الجبين
وعمره وحياته عشانها اتوهب
............................
وفينا إللى عشقه فى لسانه
وفينا إللى عشقه فى مكانه
وفينا إللى عشقه حقيقى
بِيِبْنِى.. يِعَلِى.. يِزْرَعْ ويِحْصُدْ
يجرى معاها وراكب حصانُه
...............................
وفينا إللى عشقه الميدان
يضحى بروحه عشانها
لا همه حياته
ولا همه عمره ولا همه زمانه
وناس تانية عاشقة ترابها
وعاشقة سماها وعاشقة بحورها
وعاشقة الرصيف إللى تقعد عليه
وعاشقة القمر لو عدى عليها
ينور حياتها يفرد قلوعه وتحس بأمانُه
....................................
وفينا وفينا وناس يا ما عدوا عليكى
وإنتى زى مانتى
شايله الكل دايماً فى حبة عنيك
وتقولى ولادى سامحتى إللى عاصى
ودعيتى للى يجرى وبايس إيديك
.............................
وياما فى برك وأرضك ياغالية
شفتى العجب
وفوق رمل سينا حاربتى وكافحتى
وعاديتى وصالحتى لمجد العرب
ومشيتى معانا من حضارة لحضارة
تشهدآثارك وقرآن يحكى عنك
وتاريخ انكتب
ما بين فرعونية وبين إسلامية
وبين ثورة راحت وبين ثورة جاية
وثورة مضادة وجمعة خلاص
وكام مليونية وجمعة غضب
........................
واقفة تشوفى إللى حَبِكْ صحيح
وتشوفى إللى باعك ومين اِشْتَراكْ
وتشوفى إللى خانك وساءوا الأدب
وتشوفى إللى عاملين مزايدة عليكْ
وقلبك حزين ودمعة عنيكْ
هتفضح تقول مين قلبه قاسى
ومين الأنانى إللى هَمُه مَصَالحه
وعِشقْ الكراسى
ومين إللى ضحى ولوحتى غالب
عشانك يا مصر يقول اِنْغَلَبْ
.........................
بربك قوليلى.. يا حمالة الأسية
ما آنش الآوان.. نِشِيل عنك شوية
ما تعبتيش يامصر.. ما زهقتيش يا مصر
يا غالية عليا
يا نور عنية
يا نبضى وحياتى وعشقى لمماتى
وكل إللى ليا
طب قولى كفاية.. يا ولادى كفاية
تِعِبتْ حرام.. والله حرام
كفاية إللى بيا
............................
أكيد حد فيهم هيسمع نداكى
أكيد حد يجرى وهيقول فداكى
أكيد حد زيى بيتقطع عشانك
ويصرخ بقلبه .. معايا ومعاكى
فداكى يا مصر . فداكى يا مصر
فداكى يا مصر . يا مصر فداكى