عماد الدين سالم يكتب: وأخدت نفسى

وسمعت صوتك يا بلد ...بتقولى باعونى
واللى فى يوم شلتهم... ف عنيا...هانونى
واللى شافونى اتظلمت...سكتم...وفاتونى
وسمعت صوتك يابلد...بتقولى...غيتونى
طالت عليا السنين...ولا...نسيتونى
................
الصوت دبح قلبى.... وجرى الدمع ... فى عيونى
لما افتكرت إنى خلاص... سنين القوة...سابونى
والشيب أكل شعرى ...كمان رجليا...سابونى
لكن صدى صوتك...حرك....قلبى وشجونى
دبت فى قلبى الحياة...صحيتى ...مكنونى
ولقتنى فى العشرين..بنفس...شبابى وجنونى
..............
وزعقت على عزمى...وقوة صبرى...شدونى
وشفت سعد وعرابى....وجريوا معايا...شاركونى
واخضر قلبى وورد...ف الخدود...لونى
وصوتى سطع عالى ..وكل الناس...سمعونى
وأنا بجرى على التحرير
............
وأنا بجرى على التحرير....أقول للظلم ...بزيادة
الكيل طفح فينا........وشفنا الذل .........بزيادة
ظلم وخيانه ورشاوى.....ومهانة وفقر.....بزيادة
ولقيت ورايا طوفان......بشر مخنوق ....بزيادة
مسلم مسيحى ........شباب ستات......بزيادة
والنيل دا لما يفيض.....بيدى الخير.....بزيادة
واحنا وعيالنا وحياتنا.....طرح النيل ...بزيادة
.............
أنا قلت يمكن صوتى...يزيد الثورة ...بزيادة
ماهو قالوا صوت على صوت .....بيدى القوة.... بزيادة
لقيت شباب يفرح ....يجيب الحق بزيادة
وشهيد يموت بينهم....يزيد القوه بزيادة
طمنى على بكره...وبعده كمان بزيادة
أنا قلت دى مصرنا...وجاى النصر ...بزيادة
..........
لقيت رصيف فاضى وفيه الضله بزيادة
قعدت وقلبى ارتاح وخدت نفسى بزيادة