د. هانى أبوالفتوح يكتب: عَاشِقْ وَطنْ!!

يا مصر قولى
وأنا اللى عاشقك من زمان
نفسى أحكيلك
عن مشاعر لشاعر وعاشق وطن
وللا أسكت أحسن يامصر
وأجرى بإيدى أَحَضَرْ كفن
.......................
شايفك ياغالية ولادك باعوكى
وشايف كمان إللى قبضوا التمن
وشايف قُصادى غلابة فى شوارعك
وكنتى بسماكى وأرضك سكن
وناس من ولادك بيقسوا عليكى
وإنتى إللى شايلة هموم الزمن
لا يوم قلتى برة.. سيبونى لوحدى
ولا يوم صرختى.. وطردتى العفن
لإنك بطبعك عفيفة وشريفة
ولإنك بعادتك حمالة القسية
وشايلة.. ياغالية.. جبال المحن
وحاسس بحرقة ومرارة فى صدرك
وحاسس بصرخة وصوت من شجن
...........................
ماصدقتى.. قُلتى..
أزمة وعدت.. وهَمْ.. وراح
هنفرح وبكرة نداوى الجراح
ثورة جديدة وحرية جاية..
وفجرى.. ولاح
لكن خسارة اللى كان فى الميدان
صديقى وصديقك شريك الكفاح
دلوقتى.. بنقعُد نِقَطَع فى بعض
نحكى ونقول.. عَمَلْ أوعَمَلتْ
ومن كل ناحية.. بلد مُستباح
مابين المطالب.. وبين المثالب
وبين اقتصاد.. بينزف وساح
وبين بلطجية.. وبين أمن غايب
وولاد شوارع.. وولاد سفاح
وفرقة وطوايف وفتنة ومذاهب
وكله إللى يفهم والباقى سداح
الكل أصبح لسانه فى إيده
يضرب فى أخوه وشايله سلاح
..........................
بقيتى ياغالية كأنك دبيحة
فى وسط الميدان
مش كافى عليكى الهم الكبير
هناك فى الليمان
وكفاية الفساد اللى عشش سنينك
وربك لا صانُه.. لا سَتَرُه و بَانْ
وعرفنا مين إللى نهبوا خيرك
وفين إللى غرفوا بحور الحنان
ولا صانوا عرضك ولا صانوا أرضك
وعرفنا الجبان
وقلنا هنبدأ معاك من جديد
نحس بدفاكى.. وننسى إللى كان
وجايز نسامح .. لو كنا نقدر
كبير .... كان.. صُغَير
يِرَجَع فلوسك وجاب لك جنان
بشرط العدالة تقول وبصراحة
هل فيه خيانة.. ومين إللى خان؟
أسال من دمانا.. عشان نروى أرضك
عشان تبقى حرة.. وعَشَانا.. وعشان
كل إللى عاشقك.. يعرف بأنك
واحة محبة . و واحة سلام . و واحة أمان
.........................
لكن ياغالية .. خسارة وحرام
أشوفك قصادى بتبكى فى سرك
ومانعة الكلام
وتشكى لربك
وتقولى.. إنت عالم لوحدك وقادر
وشايف وسامع خناقات ولادى
والفرقة إللى بينهم وضاع الإحترام
وشايف كمان الطمعان فى حكمى
وعامل حكيم.. وعامل زعيم
وعامل مُربى.. وعامل إمام
وأنا فيا إللى فيا
لا ناقصة طمع.. ولا ناقصة عتاب
ولا ناقصة ملام
.......................
جريت جَرى.. أكتب حروفى
ونازلة دموعى .. فارقت المنام
يا حتة منى .. أنا حتة منك
ياروحى ودمى.. وبحر الغرام
سامحينى يا أمى.. لوشيلت كفنك
وجريت عالجوامع
يسمعنى اللى سامع
فى وقت الصلاة ووقت الأدان
بأدعى.. يارب
دى مصر يارب
يارب إحمى مصر
وتعيش أرض مصر
اهدى لها ولادها
إخوات عالدوام
إحميها يارب
بحق الحبيب
رسول المحبة..
رسول السلام