نانسى عماد تكتب: بحلم افتح عنيا

بحلم وفتحت عنيا...... على عدل وحق وحرية
على حاكم ظالم اتحاكم بنزاهه وعدل وشفافيه
على شعب رجعت له كرامته وخلاص مابقاش تانى هفيه
على حق بيرجع لصحابه ياما عاشوا سنين ظلم غبيه

بحلم وفتحت عنيا...على دستور كله إيجابيه
مش خلطه لحبة حراميه
على انتخابات حرة نزيهة مش جايه بلقمة وجلابية
بحلم افتح عنيا ....على مصر عظيمة وعفية
واللقمة فيها مكفية من غيرولا ذل وتضحية
ولافيها فقر ولامهانة ولا شلة حكام حرامية
...................
بحلم افتح عنيا ....على حاكم بيراعى بلاده ويخاف من شعب عرف حقه
ومقدر معنى الحرية
على شعب عرف ياخد حقه بطريقة سليمة وشرعية مش عنف وعافية وعصبية
..................
بحلم افتح عنيا ....على شاب اتخرج م الجامعة ولقى له وظيفة ومهية
وتناسب علمه وشهاداته وسنين قضاها فى كلية
من غير ما يدور ع الواسطة أو يدفع حبة نقدية
بحلم افتح عنيا.....على عامل بيراعى ضميره وبيبنى بلاده بجدية
......................
بحلم افتح عنيا .....على حد يعلم أولادى بأمانة مش حصة لعب وتسلية
أو صابح نايم ف الحصة تعبان من لم النقدية
بحلم افتح عنيا.....على طفل عايش لطفولته ببراءة وفرحة وعفوية
لعمره ف يوم هيكون بلية ولا شايل هم النقدية
بحلم افتح عنيا ....على زرعة فى أراضى بلادى مزروعة بأيدين مصرية
لافيها رش ولا كيماوى وبخلطة أمراض مسقية
.............................
بحلم وبحلم وهحلم لحد ما كل حلمى يتحقق طال الزمن ولا قصر مسيره يوم يتحقق واللى حقق يوم حلم كان أبعد من أى حلم قادر فى يوم لحلمى يحقق.
فلتحيا الثوره التى كانت سببا لهذا الحلم التى كانت أكتر من مجرد ثورة بل هى بركان ظل يفور ويغلى لينفجر وتمحو حممه آثار ذل وظلم وفقر وجهل، ثورة أعطتنا الفرصة لنحلم ونظهر ما بداخلنا من حب لهذه البلاد وأدركنا أنه لا مستحيل تحت الشمس... فلتحيا الثورة التى لم تغير فقط سياسات وحكومات بل غيرت شعبا بأكمله، أصبح كل منا يعرف قوته وقدرته على أخذ حقه بالعقل مش بالاعتصام والعصبية ولن يسمح لأى حاكم أن يظلم ويسرق ويذل أصبح كل منا يعرف معنى الحرية.. حرية لازم نحافظ عليها نشتغل ونبنى ونطور ونراقب ونحكم ونقرر ولا نسكت على ذل وظلم ولا نسكت ونخاف ونكش ولا نفترى ونتجبر ونتغر...
فلتحييى يا بلادى دوما وتحلى بثوب الحرية.