فيسبوك
واتساب
ــ خشــــن خيوطـــــك يامعلّم
وأغزلى خيط بس معضعض..
فيه وبر
على شوك
على صوف
بس صوف (م) اللى يكهرب..
وخيّط
ووسّع فى الشّكة ..
خيّط
وعرّض فى التكّة..
دى أمانة مش رايحة مكة..
دى رايحة للى سرقوها جملة
مش قطّاعى
ولا فكة..
خيّط
وخلّى الخيط أعوج
وجهّز ترنج من الأبيض !!
ـــــــــــــــــــــــــــــــــــــــــــ
ــ وعلى طرف السرير الميرى
حطه
دا هايلبسه شيرى
وقوله : تعال دوق المر
اللى سقيته لىّ سنين
واللى سقيته برضه لغيرى
وتعال خش كده ياباشا
خش ويّا الحشاشة
خش يا أبو أيد قفّاشة
خش يابو خد ملعلط
ووش مورّد
يابو الترنج ياحلو يا أبيض !!
ــــــــــــــــــــــــــــــــــــــــــ
يابانى قصورك (ع) المرجان
يابو حمامات شغالة بزراير
يابو مكن للمية الصفرا
وكاس دهب داير داير
خش ع الريحة الزفرة
على وشوش مجرمة كافرة
على الجركن يابو جاكوزى
على العرق
والريحة الزفت
على الجراية
وعلى اللفت
يابو الفطار جاى من ساركوزى
سخن وكمان على الموضة
خش على العشرة ف اوضه
ياللى شعرك كله شاب
وكل يوم مع بنت شباب
وكل ليلة مع مزة
عجوز وبتموت فى اللذة
واحنا بنقتل بعضينا
على أوضة ف قبر
طب خش يالله على العنبر
ولو راجل خدلك شبر
وورينا أزاى هاتعيش فى طرة
من غير ما يسحبوا منك الاندر
يابو الترنج الحلو الأبيض !!
ــــــــــــــــــــــــــــــــــــــــــ
ــ صغّرتها
وهى كبيرة
وكسرتها
واستخصرت جبيرة
وسرقتها
وسبت الشعب
عشرين يناموا على حصيرة
والمية تجيلك بالطيارة
عشان برصين
وعشان فارة
بعتنا ليه بخسارة ؟
وليه خليت شعبك م الرعب
يكلم نفسه زى المجنون
طب خش ياحبيبى الكراكون
واتهنا بالطبخة السودة
وسبرس
وخمس فى سيجارة
واستنا بقا كل أول شهر
على بال ما العرسة تيجى بزيارة
وتجيبلك عيش على حلاوة
عشان قفاك مايبقا أعرض
يابو الترنج ياحلو يا أبيض!!
ـــــــــــــــــــــــــــــــــــــــ
وياريت تجيب لك وياها
اللى عشانهم خنت العهد
وبعت بلادك بالحتة
وسرطنت الورد
ودوخت الشعب وبهدلته
وشويت حتى الجثث فى اللحد
ف خش يا معلم (ع) السجن
وعد اللى باقى من عمرك
وركزفى العد
وخليك خشن والنبى يا ضنايا
وخليك أنشف
وخليك أجمد
لأحسن المساجين مجانين
يقلعوك الترنج الأبيض
وتلاقى نفسك بقيت حمدية
بدال ماأنت كنت ..........
ياابو الترنج يا حلو يا أبيض
ماهر مهران
