د.هانى أبوالفتوح يكتب: دَسْتورْ يَاأسْيَادنا دَسْتورْ

كل العالم من حوالينا
بيجرى بيجرى وبيتحَوِلْ
وإحنا لسه بنسأل بعض
مين الأول ؟ مين الأول ؟
........................
آدى فريق واقف بيِصَرَخْ
وعامل فيها فاهم ويْتَرخْ
الانتخابات قبل الدستور
وإلا ساعتها هَنِطفى النور
ونشعللها ونولعها
ونمشى نهد بيوت وقصور
ونبقى أُسُودها وصوتنا هيعلى
وناكل بعض ونبقى نسور
..........................
وفريق تانى يقول .. انساني
الأول هو الدستور
وألا هنرجع تانى ونثور
إحنا طلبنا واضح جدا
لو يتأخر ما اتنفذش
هنخليلكوا الدم بحور
...........................
وفريق تالت وعْيَارُه فالِتْ
بيقول إسمع لازم الأول
كلنا نعرف مين رَيِسنا
ييجى يحكيلنا ويوَنِسنا
ويعرفنا كام يِدينا
ويفَرحنا بطقمين صوف
ويا الكَسْتُور
........................
دى قصتنا ودى حكايتنا
إللى بنحكيها بقالنا شهور
ونُص الشعب وتِلْتُه معاه
مايعرف غير إتفضل خُشْ
تعالى يا أخينا ..
يِرُد يقول ..
يا خْوانْ .. دَستور
كل مطالبه فى رغيف عيش
كل مُناه فى الجيب مستور
.........................
إحنا الشعب الطيب جداً
إللى عمره ماعرف الصف
وإللى حياته ما فيها طابور
فى الحرية بنمشى الخطوة
تاتا تاتا وطريق مكسور
وف الوطنية ضاربينها تلاته
ومش فاكرين منها ألا عبور
..........................
يبقى تعالى ياواد يا شحاته
نادى لشاويش ولْلا لمأمور
خليه يشرح لينا الأَولْ
ويِْقَصَرْ فى كلامه ما يْطَوَلْ
أصل أنا سايب الشاى عالنار
والواد عوضين قام على حِيلُه
هناك مَنْطُورْ
البِتْ حميدة جالها الطلق
و لا فيش دَاية و لا دَكْتور
.........................
بس حميدة دى بنت أصول
ومن بيت عِزْ عليها النور
حاملة فى شعب بالملايين
عاش فى حياته كتير مقهور
و لا بيفكر غير فى اللقمة
وغير فى الزرعة
وشِوالين قمح ولْلا كماوي
ويا تقاوى و ويا بذور
وأكبر حِلمُهْ
يِرْكَبْ باص ولْلا الحنَطور
وإحنا قال جايين نِشرَحْلُه
ونِْفَهَمُه ونقول دُستور
وهو يِرُدْ يقول مَانى فاهم
دَستور يا أسيادنا دَستور
دَستور يا أسيادنا دَستور
دَستور يا أسيادنا دَستور