سامى مرسى يكتب: عايز أتجوز

كنت بفكر من شويه فى مصاريف الزواج والشقة والصعوبة إللى بقت فى خطوات الزواج إللى بقت أصعب من الوصول لقمة إفرست فجاتلى فكرة عايزكم تساعدونى عليها.. الفكرة ببساطة إنى عندى 1700 واحد على الفيس بوك وأنا عارف إنكم كلكم بتحبونى، وأكيد لو طلبت منكم حاجة هتعملوها على طول.

أنا عايز من كل واحد منكم 100 جنيه والله 100 جنيه بس شفتوا بقى أنا قنوع إزاى وبحسبة بسيطة هيكون معايا كدة 170000 ألف جنيه وربنا يقوينى على الباقى، وأنتم عارفين يا أبناء وطنى إنى قد قدمت التضحيات لكم ولم أتوانى يوما فى خدمتكم أو خدمة الوطن ..وهنا تذرف دموع القراء ويهتفون بالروح بالدم نفديك يا سامى يا مرسى ويبدأ التصفيق من الجماهير لأننى ألهبت حماستهم.

بعد التصفيق دقيقة صمت، أعود وأكرر أننى لن أنسى كل من دفع لى 100 جنيه وبعدين انتوا عندى على الفيس بوك يوم ما تيجى تتنيل قصدى تتجوز هديها.. لكن أوعد أصدقائى أننى سوف أعمل دى اكتيفاشن للأكونت بتاعى حتى لا يستطيع أحد ملاحقتى وكذلك هعمل بلوك لكل من تسول لة نفسة ان يجيب سيرة موضوع ال100 جنية بعد كده... ومنك لله يا مخلوع إللى خليت الشباب مش عارف يتجوز.

وأخيرا لتلقى التبرعات على حساب رقم 170000 أيوة أنا عملت رقم الحساب نفس رقم المبلغ إللى أنا عايزة مهو أنا تراينر بردة وعارف يعنى إيه جول.