متستغربش أوى كده
ده عصر بكام وكام تدفع
ولو حتى هاقول أنا مين
محدش راح يقولى خلاص
أنا عرفتك!
لأنك وانت بتقوله أنا شايفك
هينسى أنه يوم عرفك!
يقول تايه فى دنيا جديدة
ومش لاقى خطايا بعيدة
قعدنا كلنا من غير ولا حتى
بواقى حديدة!
جيوبنا شقها التبذير
وكلنا من غبائنا كتير
تعبنا وقلنا نو تحوير
ما تدفع يلا فيد الغير
دى مش رشوة
بس هدية
والله يعم فيك الخير
هدية؟
طب مناسبة ايه؟
هتدفع ولا أشوف غيرك
ده رد خطير
يااه حججنا كتير
يا ناس مايلين
نسيتوا الدين
دى حتى الدنيا ولا تسوى
اتنين مليم
ونرجع تانى ونقول
العيب فى مين
العيب فى مين
ياهل المحبة والكرم
العيب ف مين
ياهل الحضارة والهرم
العيب ف مين
ما تقول يا فندى يا محترم
العيب ده فينا؟
ولا ف اللى خد التمن؟
باع دنيا فيها الخير شظايا
نار.. ودم
باع جار وصاحب
باع قريب
وابن عم!
باع نفسه قبل الكل
وصبح من عدم
من دم أطفال ماتوا لكن
حياهم الزمن
من دم شهدا ماتوا علشان
يحييوا القيم
من دم ابنك قبل بنتك
لجل ما يدفعوا التمن
تمن خيانتك
تمن غباءك
تمن تجارتك ف القيم
فوق يا بن بلدى
قبل ما يتوه الزمن
فوق قبل ما يضيع
اللى باقى من الأمل
فوق قبل ما يصير الجبل
أرض خضرا
ترويها الهموم
وتصير نبتتها سم!
هتقولى إيه كان السبب؟
فقر ونكد؟
حبل اتعقد؟
حوالين رقبتك من زمن؟
طب ايه التمن؟
غير إن فيك حقد اتولد
ضيعت بيه بنت وولد
خربت بيه كل البلد
وغضبت بيه فرد وصمد
روح بص ف مرايتك وشوف
هتلاقى بعد الأمن.. خوف
هتقولى ايه؟
كانت ظروف؟
دى حجج الوف
اللى اشتاروك
تانى يوم باعوك
هربوا وسابوك
وانت اللى ف بلادك بقيت
خاين.. وتيييت
تيت ديا ف عقول الشباب
يعنى..... عبيط
مشاركة
اضف تعليقاً واقرأ تعليقات القراء
مشاركة
اضف تعليق
تم أضافة تعليقك سوف يظهر بعد المراجعة
عدد الردود 0
بواسطة:
احمد بحيرى
رائعة
اتمنالك التوفيق يا سمر
عدد الردود 0
بواسطة:
احمد عبد الله جاد
ممتاذة
عدد الردود 0
بواسطة:
نانسى شما
هايلة يا سمورة
يارب دائما نقرا لك كل مايمتع فكرنا