أمل عبد الله تكتب: سيادة النائب هى حكومة واللا أيه

مش عارفه هى قامت ثورة واللا أنا كنت بحلم بمجتمع فاضل قام فيه الشباب بوعى ومسئولية وغيروا النظام تصوروا حلمت أنهم أطاحوا بمن جثموا على صدورنا 30 سنة، غرقونا وأصابونا بالأمراض وقطعوا عنا الميه من أفريقيا ووصلوا الغاز لأعدائنا وفقرونا وسرقونا وشبابنا وشعبنا خلصونا منهم بثورة سلمية وبتحضر آثار إعجاب العدو قبل الصديق وجابوا رئيس حكومة لأول مرة بإرادة شعبية مش بتعيين ووقف المسيحى يدافع عن أخيه المسلم، وهو بيصلى ويحمى ضهره ووقف المسلم يدافع عن المسيحى ويحمى كنيسته وهو فى الميدان والإخوان نسيوا أنهم أخوان وافتكروا بس أنهم مسلمون ومصريون ودافعوا عن مصر فى الميدان إلى ساعتها كان أم للمسلم والمسيحى والإخوانى والسلفى والمحجبة وغير المحجبة كانت مصر أم للجميع والولد جنب البنت لا فيه تحرش ولا معاكسات، إنما الهدف أسمى وأكبر من الهيافات وعلم مصر اترفع على البيوت والعربيات وعلى صدور الشباب ووجهوهم والكل حس إن مصر بقت بتاعته لازم يصونها ويحافظ عليها.

وصحيت من الحلم ولقيت مصر تانية غير اللى كنت بحلم بيها ولقيتهم بيقولوا فتنة طائفية بين المسلم والمسيحى وضرب كنائس وشويه كاميليا وشويه وفاء وكمان سلفيين وإخوان وصوفيين أيه ده كله؟ وسمعت عن سرقات وجرائم وبلطجيةة بيثبتوا الناس فى الشوارع وإضرابات وقفت مصانع وأسعار زادت والناس بتقتل بعضها علشان السولار والحكومة اللى حلمت أنها جت بإرادة شعبيه لقيتها فى الحقيقة ماشية على النظام القديم فى تعيين الوزرا وهو نظام اللى نعرفه أحسن من اللى مانعرفوش يعنى نظام الشللية القديم قاعدين يجتمعوا ويبحثوا ومافيش أى تأثير لهم والنائب يقولنا إنهم مابيناموش من كتر اجتماعات مجلس الوزراء ومن كتر المباحثات فى الحلول المطروحة للأزمة اللى إحنا فيها ومافيش مردود لكل ده على أرض الواقع وقاعدين نتكلم عن عفو والمحاكمة للرئيس السابق واللا الهانم ونتشاكل والفضائيات تسترزق وقاعدين نجيب الوزرا يتكلموا بالساعات ونسلط عليهم الأضواء هما وزرا ولافنانين.. سيادة النائب هى حكومة واللا أيه
مش أحسن أرجع أحلم من جديد.