هتعتذر لنا..
عن الغاز اللى بعته لعدونا
بتراب الفلوس وكله من دمنا
هتعتذر لنا..
عن ضباطك اللى دقوا المسامير فى عضمنا
وجروا الكلاب ونهشوا عرضنا
ورمونا جوه السجون وضاع حلمنا
هتعتذر لنا..
عن المبيدات اللى سرطنت أكلنا
والفراولة اللى طردت قمحنا
ولا نسيت كمان اللى جرا لقطننا
هتعتذر لنا..
عن اللى ماتوا فى بحرنا
وهربت صاحب العبارة مننا
ولا الشباب اللى ضاقت بيه أرضنا
فركبوا البحر واختفوا من وسطنا
هتعتذر لنا..
عن رصاصات الغدر اللى انضربت فى ضهرنا
قتلت وجرحت الآلاف مننا
دول عمرهم ما كانوا أعداء ولا كانوا فى يوم عدونا
مش هنقبل اعتذارك.. حتى لو رجعت حقنا
لأن فيه ناس ماتت وموكلوش حد مننا
وهم دلوقت عند الديان.. مستنيين عدالة ربنا
مشاركة
اضف تعليقاً واقرأ تعليقات القراء
مشاركة
لا توجد تعليقات على الخبر
تم أضافة تعليقك سوف يظهر بعد المراجعة