دعاء حمدان تكتب: يا إسماعلاوية

يا إسماعلاوية يا ناس قلوبهم غاليه عليا
يا ولاد بلدى بحبكم و فرحى أكيد من فرحكم
و حزنى يبقى حزنكم و قلبى دايما عندكم
بحبكم عشان أرضى هى أرضكم
يا قلوب أصيله و كل قلب تلاقيه كبير
تعيش ما بينهم يحسسوك أنك أمير
لو هحكى عنكم يا ولاد بلدى هقول كتير
أما البلد آآه من البلد بعشق ترابها
بعشق ريحتها بعشق خيالها
يحكلكو عنها أبطال قنالها
أول ما اروحها تخطفنى روحها و تحدفنى حدف
ألاقى نفسى يا بلدى فيكى بدور و لف
هقول كمان فيكى الآمان
فيكى المحبه بين الجيران
يا بلدى ده انتى طيبه
دايما لقلبى قريبه
مهما الزمان بعدنى عنك
هرجع و اقول انا حته منك
ما أنا أصلى بنت إسماعلاويه
و على حبك فتحت عينيا
بجد يعنى ده فخر ليا
لو يوم نسيت الدنيا ديا
مش هنسى بلدى و ولادها دول
و هرجع و اقول يا اسماعلاويه
بجد انتو ناس ميه ميه
فى كل حاجه شاطرين شطاره
فى الكوره يا بنى فن و مهاره
و لعيبتنا أهى دى الأماره
هفضل أشجع لو أموت و أعيش
ما أنا أصلى بنت من الدراويش
دول كلمتين كتبتهلكم بحسن نيه
فضفضت بيهم عن اللى فيا
بس الكلام جوايا لسه ليه بقيه