صلاح يحيى يكتب: شفت المستقبل وجيت

لوحة استعراضية
الراوى.............
تحدث الشهيد للأحباء
وتصاعدت القلوب إلى السماء
وجلة لله بالدعاء
وعادت لجموع الشباب أضواء
دعوة للقاء
لتتحقق على الأرض كلمة السماء
ثورة تنير الظلمة وتحرق الضباب
هيا يا شباب

نواة ثورة الشباب من دعوا للقاء...

رحت النهاردة شفت
المستقبل وجيت
يلا... يلا
يلا يا شباب

معايا نروح نشوفه
ونرجع من جديد
أحسن من اللى
شفناه ح نعمل
وعليه نزيد

يلا ... يلا
يلا يا شباب

ذات المجموعة بعدما انضم لها مجموعات أخرى..
نعمل المستقبل
بقلوب عيونها حيوية وأمل
ده إحنا بالكفاح والعمل
ح نبنى
ونبنى سد تانى وهرم
نكتب بكره
بالأيمان بالولاء والقيم
بالعلم والانتماء والقلم
يلا... يلا...
يلا يا شباب


الراوى.......................
شبابنا فى ميدان التحرير
اتجرحوا وصمدوا
مسلمين ومسحيين للتغير
استشهدوا ودعوا وصلوا
خلوا التاريخ
يحب يكون بكره بدل إمبارح
لما اتجرحوا وصمدوا
واستشهدوا وصلوا

يلا... يلا...
يلا يا شباب
وتزداد مجموعات الشباب...
لما سبنا
الروشنه والتنفيض والطحن نار
والمفسدات والمغريات والاستهتار
الواحد منا بسرعة صار
مدرسة وجامعة
ميدان وقلعة
وأسطول ثوار
للصحرا مزارع وبنى
وفيها عمار
يلا... يلا
يلا يا شباب

وتتعاظم الأعداد والمجموعات.......
ندى لبلدنا وندى
من غير ما نقول هات
نقهر اليأس بالعرق والابتسامات
نسبق الزمن ونبهر الدنيا
بالعربى وكل اللغات
بإصرارنا واجتهادنا
ح تملاها شبابيتنا
إنجازات ونجاحات
لما المستقبل
ح يعدى علينا
ح يتوه
لأنه ح يشوفها كلها خضره
ومصانع من السلوم لسينا
للشلالات

مصر كلها.............
يلا... يلا
يلا يا شباب