راضى على حسين يكتب: رسالة عاجلة إلى التاريخ

سجل يا تاريخ أعظم ثورة = أجمل قصة لتانى عبور
كان الشعب عايش متغرب = جوا بلاده كان مقـــهور
طافح كاس الذل مــــرار = علشان لقمة يلف يـــدور
عايز يخلى الصحرا خضار = يلقى جناينه صبحت بور
ضايع حقه قدام عيــــــــنه = رشوه فساد وبهتان زور
يغزل توب الفرحه سراب = نص العمر قضاه فى طابور
صوت الضحكة معاه متكتف = مركب أمله ما لاقى بحور
مخنوق صوته بحبال خوفه = يصحى يلاقى الهم فطور
كل الصورة كانت شخابيط = مقطوف حلمه ف عمر زهور
كان بيشوف الكدب مجسم = قلم الصدق ملهش سطور
كان عطشان والنيل ويـــاه = ساكن عشه رصيف وقبور
كان محروم من خير أوطانه = حاسس إنه يا دوب طرطور
كان الحمل بيقسم ضـــهره = مهدود حيل بجناح مكسور
كان عريان وغيره بيملــك = فيلا شاليه ورصيد وقصور
مهما يصرخ يشكى ويبكى = كانوا يقولوا دى أزهى عصور
كان الظالم نافش ريشـــــه = ماشى يتمخطر كان مغرور
حتى القمح جابوه متسرطن = ديابه بتنهش قوت عصفور
خلوا الشعب تايه متغــــمى = عصابه بتعزف لحن شرور
هب الشعب المصرى المارد = دمه بيغلى وكان بيفــــور
حطم كل قيود الباطـــــل = كشف الطابق كان مستور
خلا فنون التزييف بانــــت = خلا ليالى الضلمه بــدور
خلا شمس بلدنا تغـــــنى = خلا عهد الظل يغـــــور