راضى على حسين يكتب: الأقنعة والكلابش

مد الأيادى البس كلابشـك
انسى الشياكه ولبس الحرير
انسى الوجاهه ومكتب مكيَّف
وكدبك بإنك بترعى الفقــير
يا ناهب بلادك وعامل بتحرس
يا خاين الأمانه وبايع الضمير
بتظلم وتبغى وتنهش فى قوتى
ونشرب مجارى تقوللى عصير
واخد فى كرشك فلوس الغلابه
مواطن بيشحت ما لاقى حصير
افتح كشف حساب لعمايلك
ألاعيب قتل فنون تزويــــر
حالف بإنك تصون المصالح
نلاقى عهودك فى لحظه تطير
تحلف بإنك رمز النزاهــه
وتطلع سيادتك حرامى كبير
مساكن وظايف لناسك وأهلك
فسادك ورشوه ما ليها نظير
طالع علينا فى كل البرامج
تأمروتنهى كلامك يصـــير
تهزالكتاف ويحيا الهتاف
بتخدع شعوبك وظلمك مرير
موكب جنابك يعدى يفوت
يعطل مرورنا وخط المسير
عايش غرورك وفارد جناحك
وناسى بإنى المولى بصــير
بانت جرايمك فضايح جلاجل
وتظهر حقيقتك مسجل خطير
هات الكراسى المناصب تفيدك
ياما سابوها قبلك كــــــتير
ومهما يا ظالم تكبرمخالبك
دا صوت العداله هيفضل جهير
مد الأيادى البس كلابشـك
واخلع قناعك بإنك وزيــــر