الحق.. أنا رحت الميدان مالقيتوش
وكل اللى فاكرة إنى ساعتها ما صدقتش اللى قال ما نسيبوش
هى دى غلطة.. وإلا حلم وهاصحى ما افتكروش
أنا حلمى كان جميل.. وكانت نيتى إنه يتحقق وما انساهوش
أصحابنا اللى كانوا فى الميدان، دلوقت على كل قناة ما بيسكتوش
هوه انتو وانتو رايحين.. على الميدان ما عديتوش؟
وكاتبنا بيكتب ويحلل، طب إيه الفرق؟ ما هو كان بيكتب والنظام ما يعبروش
والشرطة مش راضية تنزل.. والبلطجة فى الشارع حلق حوش
والثورة بقت 100 حزب.. والجروبات على الفيس بوك ما يتعدوش
وجمال وعزمى فى النادى.. هوه احنا مش عملنا الحظر علشان ما يبرطعوش؟
ورجعلنا عبود و اصحابه.. هوه فيه إيه، الناس دى ما بيموتوش
وحريقة هنا وحريقة هناك.. أما بالنسبة لغليلى على الشهدا، النائب لسه ما طفاهوش
وفلوسى اللى هنا وهناك.. كل المليارات دى لسه ما رجعوش
وقانون اعتصامات وشغب.. بس على الله علينا ما يطبقوهوش
أما بالنسبة للجيش.. ده خط أحمر ما نقربلوش
والمجلس شغال ولحاله.. والدنيا حواليه تضرب تقلب ما بيهموش
يا أصحاب الثورة، شباب وكبار.. احنا عملنا الثورة علشان الغلط ما نعديهوش
الغلطة فين؟.. والله اللى بيحصل ده كله على بعضه ما بفهموش
هوه اللى بقوله صح واللا الميدان لسه فى مكانه.. وأنا من لخبطتى ماشفتهوش
شكلنا كده هنبدأ من تانى.. بس المرا دى اللى يقولوه لنا ما نصدقهوش
ميدان التحرير
مشاركة
اضف تعليقاً واقرأ تعليقات القراء
مشاركة
