صالح الغازى يكتب: الأسد والحمامة

الأسد والحمامه2010

فى الساحة الواسعة متجمعين
المشنقة جاهزة
حمامة بيضا قشطة
ناعمة زى ملمس الدم
ظهر الأسد مكشر
زأر الأسد وقال:
أفعالك غلط
ما تلويش دراعى
كانت وديعة
لونها مخطوف زى الميتين
حامت حوالين نفسها
قالت:
فُكنى
أكرم لى أروح مكان تانى
ضاق رزقى فى مملكتك
وأنت دايس على دماغى
كلهم شافوا الصورتين واضحين!
الحمامة بتلوى دراع الأسد
الحمامة تحت رجل الأسد

الحمامة والأسد2011

باتت نار
صبحت خَضَار
اتفرق الضباع من حوالين الأسد العجوز
نده ع السحالى من جحوره
ولا عبروه
زئر زى بيت مهدوم
قال: أنا ملك الغابات
صاحب المجد العظيم
قامت الحمامه
الخير من قلبها
يملا الدنيا وداعه
ويجود على أهلها
قال: اتحملونى شويه
أمشى بكرامتى
قالت:
جابنا ورا
فرَّط فى الأمان
دلوقتى يتحاكم المجرم
ونبتدى الأفراح
الصورتين كده واضحين
الحمامه رافعه راسها
الأسد مع السحالى فى الجحور