أطلقت كلمة القلة المندسة أيام حسنى بيه أفندى المخلوع لما شافوا ملايين فى ميدان التحرير
فسألوا حسنى قد إيه اللى فى التحرير؟
قالهم يعنى يجى 5000 واحد ...
قالوله بس دول ملايين !!
قالهم اللى معترضين بس 5000 والباقى دول قلة مندسة
يا سلام عليك يا حسنى والله عبقرى ياااااه حتوحشنا حكمتك يا ريس الله لا يرجعك.
ودلوقتى فيه ناس بتستخدم مصطلح القلة المندسة تانى بس بشكل جديد بعد الاستفتاء وخاصة لما شافوا الملايين رايحة تقول نعم على صناديق الانتخاب فى يوم مشهود مصر ماشفتهوش من سنين.
فسألوا شوية من الناس اللى بتقول لا قد إيه قالوا نعم؟
قالولوهم 5000 واحد (نفس الرقم بتاع مبارك).. غريبة!!!
ردوا عليهم بس دول ملايين قالت نعم !!!
قالولهم اللى قالوا نعم 5000 واحد والباقى دول قلة مندسة مش بتفهم مضحوك عليها باسم الدين ومش عارفة هى رايحة صناديق الانتخابات ليه شكلهم حد، قالهم إن فيه طوابير سكر وزيت وفراخ فاتلمو عليهم ... ياااااه ... دا أنا قعدت ساعتين مستنى آخد ورك فرخة ولا جناح ملقيتش خالص رغم إنى من القلة المندسة دى.
بس عموماً قد إيه أنا سعيد بلفظ القلة المندسة ده خاصة لما يتقال عليك مرتين فى حياتك مرة أيام حسحس ومرة دلوقتى من أحفاد حسس.
إذا كنت قولت نعم على التعديلات أرجوك انضم معايا لفريق القلة المندسة.
مشاركة
اضف تعليقاً واقرأ تعليقات القراء
مشاركة
