راجــــــع بعـــــــــد صلاة العيد
راجـــــــع بــاكى وفكرى شريد
ضاقت بيــــــــــا الدنيا وحاسس
إنـــــى بقيت فــــــى الدنيا وحيد
أول عيـــــــــد بيعـــــــدى عليا
وأنتى يـــــــــــا أمى مش حواليا
أول عيد مارتاحش فى حضنك
ولا ح تـــــدفى ايـــــديكى ايديا
كنتى يـــــــــا أمى العيد والفرحة
كنت بنام علــــى حبك واصحى
بعــــــد رحيـــــــلك بسأل نفسى
ح أهــدى لمين الشال والطرحة
كنتـــــى أحــــــــن وأطيب قلب
واتحملتى الزمــــــــــن الصعب
شيلتى جبــــــال الهم وقـــــدرك
تبقـــــــى الأم وتبقـــــــــى الأب
قلبك كـــــــان انسان يسمعنــــى
ومفيش بعـــــدك حضن يساعنى
ومفيش غيرك حـــــــد أشكى له
م اللى تــــاعبنى واللى واجعنى
وسط الناس وبعيش وحـــــــدانى
وماغبتيش عــن بـــــــالى ثوانى
وساعات قبل مــــا انــــــام أتخيل
أول ما اصحى ح اشوفك تـــــانى
بعدك أعلن قلبـــــــى حــــــــداد
صعبة العيشة ومــــر الـــــــــزاد
بعدك مــــــات الفــــرح ف قلبى
ونسيت كلمــة اسمها أعيـــــــــاد
روحتى وخـــــدتى البركه معاكى
وبيوحشنى يــــــا غالية دعـــــاكى
انتى يـــــا أمى هناك فـــــى الجنة
وأنـــــــــا بتمنى أكـــــون وياكى
مشاركة
اضف تعليقاً واقرأ تعليقات القراء
مشاركة
لا توجد تعليقات على الخبر
تم أضافة تعليقك سوف يظهر بعد المراجعة